ССМ денеска ја поздрави одлуката на партијата „Левица“ чии пратеници до Собранието го доставија Предлог законот на ССМ за зголемување на минималната плата.
– Во услови кога ниту најголемиот пораст на минималната плата во 2017 година не го загрозил стопанството – односно фирмите не отпуштале работници, не ги намалувале платите, ниту пак им се намалил профитот- туку напротив ја зголемиле продуктивноста и профитот, очекуваме и уште еднаш ги повикуваме и другите партии и пратеници во Парламентот да го следат примерот и да го сторат истото веднаш и да покажат дека се за работниците и за граѓаните, наведува ССМ во соопштението.
Сојузот на синдикати на Македонија бара итно зголемување на минималната плата на 18.000 денари и спирално зголемување на сите останати плати земајќи ги предвид зголемувањето на животните трошоци, енергетската и топлинската криза. Како аргумент го посочуваат и зголемувањето на минималната синдикална кошничка во декември за 1500 денари во однос на декември 2020 година.
Вчера, Синдикатот излезе и со анализа која покажува дека зголемувањето на минималната плата не влијае негативно на компаниите, Напротив, влијае врз мотивираноста на работниците и на зголемување на продуктивноста на компаниите.
Зголемувањето на минималната плата ќе биде и една од темите на разговор на состанокот што во понеделник раководството на синдикатот ќе го има со владини претставници.
