Иако австралиската сојузна држава Викторија од воведувањето на локдаунот дневно бележи по едноцифрен број новозаразени лица, официјалните претставници стравуваат дека новиот сој на коронавирусот во последното жариште може да се прошири и со минимален контакт.
Државата Викторија денеска, втора недела по ред, го продолжи локдаунот во Мелбурн, со цел да се спречи ширењето на многу заразниот индиски сој на коронавирусот, но ќе ги ублажи ограничувачките мерки во другите региони, пренесуваат агенциите.
Оваа втора најнаселена држава во Австралија блокадата ја почна минатиот четврток и таа требаше да трае до 3 јуни, откако беше регистриран првиот случај во последните три месеци на локално пренесување на коронавирусот, јавија британските медиуми.
Но, бројот на инфекции постепено се зголемуваше, а бројот на контакти за следење достигна неколку илјади.
Ако ги оставиме работите да одат сами по својот пат, тогаш тие ќе излезат од контрола. Овој вид ќе биде надвор од контрола и луѓето ќе умираат. Никој не сака да ни се повтори минатата зима, изјави вршителот на должноста премиер на Викторија, Џејмс Мерлино, потсетувајќи на еден од најдолгите и најостри локдауни во државата за време на вториот бран на коронавирусот. Тогаш умреа повеќе од 800 луѓе, што претставува 90 проценти од сите смртни случаи на Ковид-19 во Австралија од почетокот на пандемијата.
Брзото воведување рестриктивни мерки, регионалните гранични контроли и социјалното дистанцирање и помогнаа на Австралија да ги задуши претходните избувнувања на локалните жаришта и да одржи релативно мал број на заразени – околу 30.100, со 910 лица умрени.
