Зоран Заев е виновен и треба да му плати на Никола Груевски 50 илјади евра, вака гласи пресудата која пред неколку минути ја изрече судијката Весна Калковска, за случајот за Македонска банка.
Судот во името на граѓаните на РМ одлучи дека тужбеното барање на Груевски се усвојува. Тужениот се суди за клевета бидејќи на две конференции со намера да наштети на честа и угледот на тужителот изјавил невистини велејќи дека тужителот е таткото на криминалот и дека Груевски зел пари во кеш на црно.
„Тужениот треба да плати на име нематеријална штета износ од 3,1 милион денари, односно 50.000 евра во рок од 15 дена од изрекувањето на пресудата“, беше соопштено во пресудата.
Премиерот Никола Груевски го тужеше за клевета, опозицискиот лидер Зоран Заев за аудиоснимката која тој ја презентираше за време на предизборната кампања на парламентарните избори кои се случија во април годинава. Заев секојдневно тврдеше дека Груевски зел мито и на криминален начин ја продал Македонска банка. Во текот на постапката се докажа спротивното. Главниот сведок, газда Нини, негираше дека некогаш разговарал со Груевски на оваа тема.
Груевски првенствено побара отштета од Заев во висина од пола милион евра, за вчера да ја намали оваа сума на 50 илјади евра.