Повеќе од половина од возрасните во Европа се дебели, според Регионалниот извештај за дебелината за 2022 година претставен од Светската здравствена организација (СЗО) во вторникот. Податоците покажуваат дека околу 59 отсто од возрасните во европскиот регион на СЗО се со прекумерна тежина или дебели.
Проблемот погодува повеќе мажи отколку жени, при што 63 отсто од мажите се со прекумерна тежина во споредба со 54 отсто од жените.
Кај децата на возраст меѓу 7 и 9 години, 29 отсто од момчињата се со прекумерна тежина или дебели, а 27 отсто од девојчињата. Само 8 отсто од децата на возраст под 5 години имаат прекумерна тежина додека кај адолесцентите овој процент е 25.
Според СЗО, луѓето со прекумерна тежина биле несразмерно погодени од Ковид-19 за време на пандемија и имаат поголема веројатност да бидат примени во болница или да умрат од болеста.
Првичните податоци, исто така, сугерираат дека дебелината кај децата и адолесцентите е во пораст поради пандемијата.
Прекумерната тежина и дебелината генерално се меѓу водечките причини за инвалидитет и смрт во Европскиот регион, што може да стане главен фактор на ризик за рак во наредните децении во некои земји, како и пушењето.
Ниту една земја нема да може да го запре порастот на дебелината до 2025 година, тврди СЗО. Таа може да доведе до рак, хронични респираторни заболувања како што се астма, мозочен удар и други кардиоваскуларни заболувања, проблеми со црниот дроб и бубрезите, болки во грбот и проблеми со менталното здравје.
Проценките сугерираат дека прекумерната тежина во моментот и дебелината се четврти најчест фактор на ризик за разни болести во регионот.
Европскиот регион на СЗО се состои од 53 земји, меѓу кои Турција, Русија и Украина надвор од ЕУ. Ниту една од земјите не е на пат да ја постигне целта за запирање на порастот на дебелината до 2025 година.
