Вработеноста во САД благо се намали во јуни, лизгајќи се под месечниот просек во изминатите 12 месеци, покажаа првите проценки на американското Министерство за труд објавени во петокот.
Работодавците отвориле нето 206.000 нови работни места во јуни, по 218.000 во мај и 108.000 во април, според ревидираните податоци.
Новите податоци покажуваат дека во претходните два месеца се отворени 111.000 работни места помалку од претходно проценето.
Бројките за јуни покажуваат приближно 14.000 работни места помалку од месечниот просек во претходните 12 месеци, соопшти Министерството.
Работодавците најмногу вработувале во здравствениот и социјалниот сектор и во градежништвото, покажа извештајот.
Нето од приватниот сектор отвори 136.000 нови работни места, а државата 70.000, што значително го надминала просекот во претходните 12 месеци, соопшти Министерството.
Стапката на невработеност во јуни изнесува 4,1 отсто и е повисока за 0,1 процентен поен во однос на претходниот месец. Бројот на невработени е благо зголемен во однос на мај и изнесува приближно 6,8 милиони.
Годишната споредба покажува дека стапката на невработеност е зголемена за половина процентен поен, со 800.000 повеќе невработени.
Просечната плата за час труд се зголеми за 0,3 отсто од мај на 35,00 долари. Во однос на истиот месец лани е зголемена за 3,9 отсто, се вели во извештајот на министерството.