Техничкиот консултант, компанијата „Суец” која била избрана како техничка поддршка во изведбата на автопатот Скопје – Блаце преку писма го предупредувала, Ејуп Рустеми, поранешниот директор на ЈП за државни патишта,дека трошоците за проектот пораснале од 172 на 240 милиони евра, поради два пати променета проектната документација. Истата компанија предупредува дека тунелите се погрешно проектирани и не се согласно европските стандарди.
Ова го посочи заменик претседателот на Владата и министер за транспорт Александар Николоски, на седницата на пратенички прашања.
Тој на собраниската говорница ги објави документите во кои, како што истакна, се потврдува дека проектот намерно се одолговлекувал и се спроведувал на овој начин се со цел една фирма да го добие тендерот за изградба на тунелите.
“Ова е докумет што првпат излегува во јавност. СУЕС на 31 мај му праќа писмо на Ејуп Рустеми – вашиот член, кое што Рустеми го крие и каде што во точка 4 – Трошоци за проектот се вели дека два пати го менувал проектот и трошоците растат од 172 на 240 милиони евра. Извинете, ама јас криминал на Ејуп Рустеми нема да реализирам. 70 милиони евра плус да се потрошат на македонските граѓани и со 20 % од анексот и затоа реков до 300 милиони евра ќе оди овој проект, јас тоа нема да го дозволам. Второ, нов документ од СУЕС, на 17.09.2024 испратено до новиот директор Коце Трајановски. Во точка 1 –Услови на рефернеца за проектирање се вели дека намерно тунелите се погрешно проектирани и не се согласно европските стандарди. Кога би имало тендер кој би го распишал Ејуп Рустеми, само една компанија може да го добие и да гради такви тунели. Извините, ниту јас, ниту премиерот, ниту Коце, ниту ЕБРД не се наивни да финансираат криминал. Знаете зошто вака тунелите се проектирани, затоа што само една компанија може вака да го добие проектот. И не зборувам јас, туку зборува СУЕС, најголемата компанија која го градела Суецкиот канал”- истакна министерот Николоски.
Тој објави дека компаниите Јубај 2 Амет, Фрукта Фрута, Кадис Холдинг и Атлантик Дооел се фирмите кои ги купувале плацевите од физички лица каде требало да поминува трасата на автопатот, а притоа плацевите биле препродавани неколку пати.
„Никогаш не е направена јавна презентација на 3-те траси што е законска обврска. Средствата за автопатот за првпат се одобрени 2019, потврдени се 2020 година. Зошто не е објавен теднер во 2021?, за да може да се продаваат парцелите и да се намести тендерот само една компанија да го добие и само таа компанија да гради тунели”- рече Николоски.
Во однос на поврзувањето и дизајнот на автопатот тој додаде:
„Сакам и ќе се изгради автопатско решение од Скопје до Блаце. Досега автопатско решение нема. Има два километри кои започнуваат некаде и завршуваат никаде. Претпоставувам знаете, кога патувате од Приштина кон Скопје, знаете дека тие 2 километри не се поврзуваат со постојаниот автопат од другата страна на границата. Добро прашање е како ќе се поврземе кога никаде не се спојуваат, а овие 2 километри започнуваат од граница со Косово кон Скопје никаде, а завршуваат исто – никаде бидејќи завршуваат во една дупка од 50 метри” – истакна Николоски.
Тој од собраниската говорница го повика Јавното обвинителство да го истражи случајот.
