Упадот на кинески воен авион во јапонскиот воздушен простор е „сериозно кршење на јапонскиот суверенитет“, изјави во вторникот портпаролот на јапонската влада, ден по инцидентот во Источното Кинеско Море.
„Нарушувањето на нашиот воздушен простор од страна на кинески воен авион не е само сериозно нарушување на нашиот суверенитет, туку е и закана за нашата безбедност и е целосно неприфатливо“, изјави Јошимаса Хајаши на новинарите.
Според јапонското Министерство за одбрана, кинески воен „шпионски авион Y-9“ навлегол во јапонскиот воздушен простор околу две минути во понеделникот.
„Се воздржуваме од давање конкретен одговор за целта на акцијата на кинескиот авион. Сепак, неодамнешните воени активности на Кина во близина на Јапонија имаат тенденција да се шират и да станат сè поактивни“, додаде Хајаши.
Хајаши рече и дека владата ќе продолжи внимателно да ги следи воените активности на Кина и „ќе ги преземе сите можни мерки за да обезбеди буден надзор“.