Новоизбраниот американски претседател Доналд Трамп во саботата го назначи извршниот директор на индустријата за нафта и гас Крис Рајт, жесток поддржувач на употребата на фосилните горива, за свој секретар за енергија.
Рајт е основач и извршен директор на компанијата „Liberty Energy“ којашто се занимава со углугите поврзани со нафтените полиња со седиште во Денвер. Се очекува тој да го поддржи планот на Трамп да го максимизира производството на нафта и гас и да се обиде да најде начини за зголемување на производството на електрична енергија, за којашто побарувачката се зголемува првпат по децении.
Се чини дека тој го споделува противењето на Трамп за глобалната соработка за климатските промени. Рајт ги нарече климатските активисти „алармисти“ и ја спореди борбата на Демократската партија против глобалното затоплување со комунизмот од советски стил.
„Нема климатска криза, а ние не сме ниту среде енергетска транзиција“, рече Рајт во видеото на неговиот профил на LinkedIn минатата година.
Рајт, кој нема политичко искуство, опширно пишуваше за потребата од поголемо производство на фосилни горива за да се извлечат луѓето од сиромаштија.
Министерството за енергетика се занимава со американската енергетска дипломатија, управува со стратешките нафтени резерви, за коишто Трамп рече дека сака да ги надополни, и води програми за заеми за да поттикне напредок во енергетските технологии.
Ресорот, исто така, го надгледува застарениот американски комплекс на нуклеарното оружје, отстранувањето на нуклеарниот отпад и 17 национални лаборатории.
Доколку биде потврден од Сенатот, Рајт ќе ја наследи Џенифер Гранхолм, поборник за електрични возила, извори на енергија како што е геотермалната енергија и поборник за енергија без јаглерод, како што се ветерот, сончевата енергија и нуклеарната енергија.
