Републиканскиот претседателски кандидат на ноемврискиот избори кој настојува да се врати во Белата куќа, Доналд Трамп, само неколку дена пред неговото прво и веројатно единствено телевизиско соочување со противкандидатка Камала Харис, актуелна демократска потпретседателка, преку социјалните мрежи се закани дека ќе ги затвори сите кои биле „вмешани во кражба на изборите“ пред четири години кога беше поразен од актуелниот претседател на САД, Џо Бајден.
Трамп, исто така, рече дека овие лица ќе бидат подложени на интензивен надзор.
„Кога ќе победам, овие луѓе кои ги украдоа изборите ќе бидат процесирани, што ќе вклучува и долготрајни затворски казни за да се спречи повторување на оваа изопаченост на правдата“, напиша Трамп, повторно изразувајќи сомнеж во интегритетот на изборите.
„Да знаете дека оваа правна изопаченост се протега на адвокати, политички оперативци, донатори, незаконски гласачи и корумпирани изборни службеници. Тие кои се вмешани ќе бидат барани, фатени и процесирани на нивоа кои до сега никогаш не се видени во нашата земја“, се закани Трамп.
Оваа порака претставува најнова негова закана дека ќе ја искористи претседателската функција за одмазда ако освои втор мандат. Нема никакви докази за некаква изборна кражба, на која тој и понатаму инсистира дека се случила на изборите во 2020 година. Десетици судови, републикански државни службеници и неговата администрација се изјаснија дека немало кражба и тој ги изгубил изборите.
Трамп избегна традиционални подготовки за дебата, бирајќи да одржува собири и настани, додека Харис од четвртокот работи со своите помошници во хотел во центарот на Питсбург. Таа се согласи на една дебата, чиј домаќин ќе биде ABC.
