Канада ќе ги разгледа сите можни опции, вклучително и контрацарини, доколку новиот американски претседател Доналд Трамп не се откаже од заканите дека ќе воведе царини од 25 отсто на канадскиот увоз, изјави во средата премиерот Џастин Трудо.
Најавите на Трамп претставуваат голем удар за канадската економија, имајќи предвид дека Канада извезува три четвртини од своите стоки и услуги на американскиот пазар.
„Ништо не е надвор од масата ако САД продолжат да се закануваат со царини“, рече Трудо по состанокот со премиерите на сојузните покраини на разговори за можните одговори на царините доколку тие бидат воведени.
Трудо не сакаше да открие детали, бидејќи сѐ уште не е познато што точно планира Трамп. „Го поддржувам принципот на пропорционалност, со други зборови, долар за долар“, рече тој.
Трамп најави дека сака да воведе царини за да го принуди својот северен сосед да ги заостри граничните контроли и на тој начин да го запре протокот на мигранти, како и шверцот на синтетичката дрога фентанил. Но, таквиот потег би го прекршил договорот за слободна трговија.
Канадскиот министер за имиграција Марк Милер одговори дека протокот на мигранти и дрога од Канада во САД е многу мал во споредба со бројките кои доаѓаат од Мексико.
Иако Трудо и премиерите на сојузните покраини тврдат дека двете нивоа на власт се обединети во нивниот став, премиерот на Алберта, Даниеле Смит, не ја потпиша заедничката декларација усвоена на крајот од состанокот. Причината е што тој се спротивставува на идејата за ограничување на извозот на нафта, која ја предложија некои федерални претставници.
Во гореспоменатата декларација се наведува дека, доколку Отава мора да им се одмазди на САД, ќе обезбеди пари за работниците и ќе им помогне на компаниите да ја компензираат штетата предизвикана од царините на Трамп.
Трудо претходно овој месец најави дека ќе се повлече од премиерската функција и дека нема да се кандидира за реизбор на парламентарните избори кои мора да се одржат најдоцна до 20-ти октомври оваа година.
