Со зголемување на капацитетот на складиштето за природен гас во Силиври, Истанбул, Турција сега го има најголемото складиште за гас во Европа, извести во петокот службената новинска агенција Anadolu.
Во Силиври денеска се одржа свеченост по повод завршувањето на проектот за зголемување на капацитетот на подземното складиште за гас, на која свое обраќање имаше и претседатлот Реџеп Тајип Ердоган.
„Со зголемување на капацитетот, Силиври стана најголемото подземно складиште за гас во Европа“, рече Ердоган.
Нагласи дека Турција денес со енергетските услуги што им ги дава на своите граѓани и индустријата, е на 17-то место во светот според количината на снабдување.
„Влегуваме во нова ера во која ќе ја доведеме нашата земја до врвот со жнеење на плодовите од напорите што ги вложивме во последните 20 години, рече Ердоган. – Нашата цел е што поскоро да ја трансформираме земјата во глобален центар каде што ќе се одредува референтната цена на природниот гас. Ја одредивме нашата енергетска визија да ја намалиме нашата надворешна зависност од примарните ресурси од 71 отсто на 13 отсто до 2053 година“, потенцираше турскиот претседател.
По зголемувањето на капацитетот, складиштето ќе може да задоволува приближно осум отсто од годишните потреби на Турција за природен гас.
Потребите од електрична енергија на објектот ќе ги задоволува ветерна турбина со инсталирана моќност од 4,2 мегавати. Капацитетот за складирање се зголеми од 3,2 милијарди на 4,6 милијарди кубни метри.
Дневниот повратен производствен капацитет се зголеми од 28 милиони на 75 милиони кубни метри.
