Убијците на Никола Саздовски само се нарекуваат навивачи, тоа се криминалци и убијци, заштитени како никој друг во државава, напиша навивачката група Комити на својот Фејсбук профил, која ги повика сите свои членови утре достоинствено да го погребаат нивниот брат Саздо.
Денеска, 09.07.2018 не напушти нашиот брат, Никола Саздовски – Саздо. Престана да чука младото комитско срце, не успеа да победи во последната битка. Десет дена, срцето, лавовски се бореше со сите нанесени повреди и на крај, се реши да одмори, да отпатува на подобро место. Саздо беше нападнат и убиен од луѓе кои само се нарекуваат навивачи, а во основа се криминалци, дилери, убијци и најважно од се, заштитени се како никој друг во државава. МВР, ОЈО, НВО-та и некои квази новинари, прво се обидоа да го заташкаат случајот и да го пренесат кон друг правец, па од кога беа фатени во лага се обидоа да се правдаат и сето тоа, само зошто беше Комита и Македонец.
Прости ни Саздо, не успеавме да те заштитиме од нашите душмани. Даваме заклетва дека ќе ја истераме правдата на било кој начин. Ќе останеш засекогаш во нашите срца и во душата на Западот. Еден ден, повторно ќе се сретнеме таму горе и ќе запееме заедно. Сочуство до фамилијата и најблиските, стои во соопштението на Комити.
Погребот на Саздовски ќе се одржи утре, 10.07.2018 на гробиштата во село Ракотинци со почеток од 13.00 часот.
Комити, утре, за да го испратиме нашиот брат како што доликува, дојдете на собирот со автомобили, кој симболично е закажан пред нашата, западна трибина од 11.45 часот со поаѓање во 12.20. Да го развиориме уште еднаш омилениот бајрак на Саздо, “Боже чувај ја Македонија”!!!, стои во постот на Фејсбук.