Украинскиот министер за надворешни работи Дмитриј Кулеба жестоко го отфрли предлогот на Турција за меѓународна истрага за уништувањето на хидроелектричната брана Каховка, нарекувајќи ја иницијативата „игра за да им се удоволи на Русите“.
Ова доаѓа откако турскиот претседател Реџеп Таип Ердоган во средата имаше телефонски разговори со неговите руски и украински колеги, нудејќи да се организира меѓународна комисија за истрага на нападот на браната, во која ќе бидат вклучени експерти од сите три земји, како и од ОН.
Говорејќи на украинскиот информативен канал 1+1, Кулеба изјави дека е уморен од ОН и другите кои предлагаат да се истражи експлозијата и ги обвини дека играат „игра на квази правда“.
„Апсолутно е јасно кој е кој“, рече Кулеба, отфрлајќи ги сите сугестии дека Украина би можела да биде одговорна за минирање на што било.
„Полекајте, господа“, рече тој. „Веќе бевме таму. Сето тоа е само игра за да им се удоволи на Русите“.
Подоцна во интервјуто, министерот призна дека на крајот ќе има некаква истрага за уништувањето на браната, но дека тоа нема да биде наскоро.
Во меѓувреме, украинскиот претседател Владимир Зеленски, исто така, ги критикуваше ОН и Црвениот крст за неуспехот да дејствуваат среде поплавите предизвикани од уништувањето на браната.
Браната Каховка беше делумно пукната во вторникот наутро, предизвикувајќи поплави во повеќе градови и села долж брегот на реката Днепар.
Москва инсистираше на тоа дека „намерната саботажа“ на браната била наредена од Киев за да се прекине снабдувањето со вода на рускиот полуостров Крим. Портпаролот на Кремљ, Дмитриј Песков, исто така, посочи дека нападот може да биде поврзан со обидите на Украина да започне контраофанзива од големи размери.
Рускиот претседател Владимир Путин го означи инцидентот како „варварски чин“ што доведе до „масовна еколошка и хуманитарна катастрофа“ и ја обвини Украина за „вршење воени злосторства“ и „отворено користење терористички методи“. Тој, исто така, ги предупреди Киев и неговите западни поддржувачи да не се коцкаат на патот на опасна ескалација.
