Украинскиот министер за надворешни работи Дмитро Кулеба ја обвини во саботата Русија дека наводно игра „игри со гладот“ со светот, бидејќи го блокира извозот на жито од украинските пристаништа на Црното Море.
На маргините на самитот на Асоцијацијата на земјите од Југоисточна Азија (ASEAN), Кулеба ги повика земјите од тој регион политички и материјално да ја поддржат Украина.
Рече дека светот треба да изврши притисок врз Русија да не се откаже од договорот за извоз на храна, „бидејќи украинските земјоделски производи се клучни во Африка и Азија“.Исто така ги обвини и руските инспектори за „тивка саботажа“, односно намерно одложување на испораките.
По потпишувањето на договорот со посредство на Обединетите нации и Турција, беше формиран тим од руски, украински, турски и инспектори на ОН за следење на извозот на храна.
„Русија треба, односно мора, да престане да игра игри со глад со светот“, рече Кулеба.
Украина првпат беше поканета на самитот на ASEAN, кој го сочинуваат Камбоџа, Филипини, Малезија, Индонезија, Лаос, Сингапур, Тајланд, Виетнам, Брунеи и Мјанмар. Сепак, на лидерите на Мјанмар не им е дозволено да учествуваат поради моменталната ситуација во земјата.
Неколку земји-членки на ASEAN досега беа резервирани по прашањето за инвазијата, тие ја осудуваат војната, но исто така се обидуваат да избегнат осуда на руската страна.
Осум од 10-те земји на ASEAN гласаа за резолуцијата на Генералното собрание на ОН за осуда на руската агресија, а Виетнам и Лаос беа воздржани.
