Украинското Министерство за надворешни работи и се закани на Монголија со „последици“ затоа што не го уапси рускиот претседател Владимир Путин по неговото пристигнување во Улан Батор во понеделникот и не го предаде на Меѓународниот кривичен суд (МКС).
Хашкиот суд издаде налог за негово апсење минатата година. Налогот ги обврзува 124-те земји-членки на судот да го приведат Путин доколку тој стапне на нивна територија.
Портпаролот на украинското Министерство за надворешни работи Георги Тихи на социјалнaта мрежа Х напиша:
„Неуспехот на монголската влада да ја спроведе обврзувачката потерница на МКС за Путин е тежок удар за Меѓународниот кривичен суд и меѓународниот систем за кривична правда“.
„Монголија му дозволи на обвинетиот криминалец да избега од правдата, со што ја сподели одговорноста за неговите воени злосторства. Ќе работиме со партнерите за да се осигураме дека тоа ќе има последици за Улан Батор“, додаде тој.
МКС може формално да ја осуди Монголија поради неуспехот да го спроведе налогот. Сепак, нема овластување да наметнува казни или санкции. Исто така, нема механизам за спроведување на сопствените налози, потпирајќи се на земјите-членки да изберат дали ќе ги почитуваат.
Ниту Русија, ниту Украина не се потписници на Римскиот статут, договорот од 1998 година со кој беше формиран судот. Украинскиот парламент го ратификуваше статутот минатиот месец, но вклучи клаузула во која се наведува дека нема да ја признае јурисдикцијата на судот за случаите во кои се вклучени украински државјани.
МКС го издаде налогот во март 2023 година, обвинувајќи ги Путин и руската комесарка за правата на децата Марија Лвова-Белова за „незаконско депортирање“ на деца од „окупираните области на Украина“. Москва ги отфрли обвинувањата како апсурдни, посочувајќи дека нејзините сили евакуираат цивили од борбена зона каде што се соочуваат со непосредна опасност од украинската артилерија и напади со беспилотни летала.
