Украинското Министерство за енергетика денеска соопшти дека ќе го запре извозот на електрична енергија по огромниот руски ракетен напад врз енергетската инфраструктура.
„Денешните ракетни напади, кои ги погодија термоцентралите и друга инфраструктура за снабдување со електрична енергија, ја принудија Украина од утре да го прекине извозот на електрична енергија со цел да го стабилизира сопствениот енергетски систем“, се вели во соопштението на украинското Министерство.
Украинскиот министер за енергетика Херман Халушенко изјави дека денешниот напад врз енергетскиот систем е „најголем во досегашниот тек на војната“.
Во телевизиско интервју, тој рече дека руските ракетни напади „на целиот наш синџир на снабдување беа извршени на тој начин што префрлањето на други извори да е што е можно потешко“.
Инаку, најмалку 11 лица загинаа, а 64 се повредени во руските воздушни напади денеска во Украина, информираше украинската државна служба за итни случаи.
Претходно имаше информации за 10 загинати и 60 повредени лица, како резултат на руските напади на различни области на територијата на Украина.
