Украина, исцрпена по речиси тригодишна руска инвазија, нервозно ги чека претседателските избори во САД во вторник, при што некои стравуваат од „катастрофа“ доколку победи Доналд Трамп, а многумина се надеваат дека Вашингтон нема да го напушти „својот сојузник“ во критичниот момент.
На само неколку дена пред изборите, украинската армија, на која ѝ недостига и жива сила и муниција и вооружување, губи територии. Русија, од друга страна, наскоро би можела да добие засилување од севернокорејските војници.
Од избувнувањето на војната кон крајот од февраури 2022 година, сојузниците на НАТО предводени од Вашингтон обезбедија клучна воена и финансиска поддршка вредна десетици милијарди долари, дозволувајќи му на Киев да продолжи да се бори против многу посилен противник. Но, Европа и САД сѐ повеќе се двоумат со месеци.
Трамп не даде никакви индиции дека ќе му обезбеди на Киев средства „да ја порази“ Русија.
„Победата на Трамп ќе создаде сериозни ризици. Ситуацијата ќе биде загрижувачка“, изјави за AFP Олег Шамшур, поранешен украински амбасадор во САД.
Најголемиот страв на Украина е дека републиканскиот милијардер Трамп ќе ги напушти, особено откако ја критикуваше американската помош и тврдеше дека може да ја заврши војната „за 24 часа“.
Трамп и неговиот тим „не веруваат во победа на Украина“ и сакаат „по секоја цена да ја запрат војната“ за да се фокусираат на конфликтот со Кина, смета Шамсур.
Доналд Трамп никогаш не ги детализираше своите планови или јавно ја поддржа „победата“ на Киев. Покрај тоа, тој е обвинуван дека му се восхитува на рускиот претседател Владимир Путин.
Според западните медиуми, планот на Трамп најмногу би бил поволен за Русија. Се состои од демилитаризација на областа окупирана од Москва (околу 20 отсто од украинската територија), без да се дозволи Киев да ја врати контролата врз таа област.
Украина, исто така, треба да се откаже од своите аспирации за членство во НАТО, како што бара Кремљ.
Шамшур смета дека таквиот план е „катастрофален“, бидејќи Русија потоа би ја обновила својата војска, а подоцна повторно би нападнала со цел „целосно да ја уништи Украина“.
Украинскиот претседател Володимир Зеленски веќе ја отфрли можноста за какви и да се територијални отстапки.
„Украина нема да ги признае овие територии (како руски) без разлика на се, без оглед на исходот од изборите во САД“, рече Зеленски, признавајќи дека Москва може да „окупира дополнителни“ територии доколку Вашингтон ја намали поддршката за Киев.
Од друга страна, висок функционер во украинското претседателство изјави за АФП дека септемвриската средба меѓу Зеленски и Трамп во САД поминала „многу добро“.
„Трамп веројатно нема да сака да биде човекот со кој Америка загуби од Путин“, вели за AFP функционерот, кој сакал да остане анонимен.
Додал дека Украина „работи на“ градење добри односи со двајцата претседателски кандидати: демократката Камала Харис и републиканецот Трамп.
Американските избори се одвиваат во критичен период за Киев. Руската војска зазема речиси 500 квадратни километри во Украина само во октомври, што е најголемо напредување во еден месец од март 2022 година, кога започна конфликтот.
Во регионот Доњецк, каде што се изведени две третини од овие напредувања, 51-годишниот украински наредник Серхиј се обидува да биде прагматичен.
„Не ми е грижа кој ќе победи. Најважно е Соединетите Американски Држави да продолжат да нѐ поддржуваат“, изјави тој за AFP, признавајќи дека победата на републиканците „може да биде катастрофа“.
Украина веќе се соочи со отпор од републиканците. Кон крајот на 2023 година и почетокот на 2024 година, поддржувачите на Трамп ја блокираа американската воена помош, принудувајќи ги украинските сили да рационализираат муниција, давајќи ѝ предност на Русија.
Богдан, млад војник кој се бори во истата провинција, се надева дека Трамп „ќе сака повторно да ја покаже американската сила и решителност“ и дека американската воена помош ќе биде засилена за да му помогне на Киев да ја победи Русија, стратешкиот ривал на Вашингтон.
Родион, вториот војник интервјуиран во Харков, исто така, е оптимист.
„Знам дека нема да не предадат“, рече војникот, ветувајќи дека ќе се бори „до крај, до нашата победа“.
