Јулија Навални во петокот изјави дека не им верува на руските медиуми кои ја објавија смртта на нејзиниот сопруг, рускиот опозициски блогер Алексеј Навални, но ако се покаже дека е вистина, таа го обвини рускиот претседател Владимир Путин и го повика светот да се бори против неговиот „ужасен режим“.
„Не знам дали треба да веруваме во страшната вест што ја добивме преку официјалните медиуми, бидејќи со години знаеме дека не можеме да им веруваме на Путин и неговата влада. Тие продолжуваат да лажат“, рече Јулија Навални, која веста за смртта ја најде на безбедносна конференција во Минхен, иако не е јасно во кое својство престојува таму, бидејќи Навални никогаш немал ниту политичка формација зад себе, ниту, пак, Јулија или Алексеј некогаш се занимавале со безбедносни прашања.
„Ако ова е вистина, би сакала Путин, неговите луѓе во владата, неговите пријатели да знаат дека ќе бидат казнети за она што ѝ го направија на мојата земја, на моето семејство, на мојот сопруг. Тој ден ќе дојде наскоро“, рече Јулија Навални.
Ја повика меѓународната заедница и „сите луѓе во светот“ заедно да се борат „против тоа зло, тој ужасен режим во Русија“. „Путин треба лично да одговара за сите злосторства што ги направи во последните години“, рече Јулија Навални.
Федералната затворска служба на автономниот округ Јамало-Ненец на својата веб-страница објави дека Навални „се чувствувал лошо“ по петочната прошетка и „речиси веднаш изгубил свест“. Во соопштението за медиумите се наведува дека бил повикан медицински персонал, но не можел да го реанимира. Причината за смртта на Навални се утврдува, додаваат тие. Рускиот Истражен комитет отвори постпака за утврдување на причините за смртта на Навални.
Во четвртокот на телевизискиот екран, затворениот руски опозициски лидер Алексеј Навални, кој почина во петокот во затвор, погледна низ заградениот прозорец, смеејќи се и правејќи шеги за тоа како му снема пари и платата на судијата. 47-годишникот се појави во добро и весело расположение, додека сведочеше преку видео врска во четвртокот. Снимката покажива и судски службеници како се смеат заедно со него.
Ден подоцна, руската затворска служба објави дека тој починал откако колабирал и изгубил свест во казнената колонија северно од Арктичкиот круг каде што издржувал долга затворска казна.
„Ваша чест, ќе ви го испратам мојот приватен број на сметка за да можете да ја искористите вашата голема плата на федерален судија за да ја ‘подгреете’ мојата сметка бидејќи ми снема пари“, вели Навални на снимката.
Порталот СОТА објави дека судското рочиште било свикано по „расправија“ со затворски службеник кој се обидел да му го заплени пенкалото на Навални.
Подоцна во четвртокот, Навални на X напиша дека добил 15 дена во самица, четврти пат за помалку од два месеца. Тоа беше неговата последна порака.
Рускиот весник Новаја Газета ја цитираше неговата мајка дека нејзиниот син бил „жив, здрав и среќен“ кога последен пат го видела на 12 февруари.
„Новаја газета“ објави дека Људмила Навални во петокот во објава на Фејсбук напиша: „Не сакам да слушам никакво сочувство. Го видовме во затвор на 12 февруари, на состанок. Тој беше жив, здрав и среќен“.
