Во дуплекс во мирна населба на унгарската престолнина се наоѓа седиштето на компанија која е поврзана со производството на пејџери кои експлодираа во Либан и Сирија како дел од очигледната израелска операција против терористичката група Хезболах.
„BAC Consulting“ го дели приземјето на скромната зграда во Будимпешта со други претпријатија.
Во корпоративниот регистар, компанијата наведла 118 официјални функции, вклучувајќи производство на шеќер и масло, продажба на накит и екстракција на природен гас.
„BAC“, наводно, испорачала илјадници уреди за кои либанските власти соопштија дека убиле најмалку 12 лица, меѓу кои две деца, а раниле околу 2.800 во вторникот во координиран напад за кој Хезболах и либанската влада го обвинија Израел.
Повеќе напади беа пријавени во средата, кога воки-токи и соларна опрема експлодираа во повеќе делови на Либан. Во вториот бран напади загинаа најмалку 20 луѓе, а повеќе од 450 беа ранети, соопшти либанското Министерство за здравство.
Тајванската компанија чиј бренд се појавува на пејџерите, Gold Apollo, во средата соопшти дека одобрила употреба на нејзиното име на уредите.
„BAC“ беше овластен „да го користи нашиот заштитен знак за продажба на производи во одредени региони, но дизајнот и производството на производите се исклучиво одговорност на BAC“, се вели во соопштението на Gold Apollo.
Портпаролот на унгарската влада рече дека пејџерите никогаш не биле во Унгарија и дека BAC Consultants дејствувале само како посредник.
„Властите потврдија дека компанијата за која станува збор е трговски посредник, без производствена или оперативна локација во Унгарија. Има еден менаџер регистриран на нејзината декларирана адреса, а наведените уреди никогаш не биле во Унгарија“, објави Золтан Ковач во средата на X. Тој не кажа каде се произведени пејџерите.
Унгарските национални безбедносни служби соработуваа со меѓународните партнери и ова прашање не претставуваше никаков ризик за националната безбедност за Унгарија, додаде тој.
„BAC Consulting“, која е регистрирана како друштво со ограничена одговорност, имала 725.000 американски долари приход во 2022 година и 593.000 американски долари во 2023 година, според регистарот на компании.
Нејзиниот извршен директор е Кристијана Барсони-Арцидиаконо.
„BAC“ може да биде акроним за Bársony-Arcidiacono Cristiana.
Барсони-Арцидиаконо се опишува себеси како физичар и консултант за проекти за решавање на еколошки и политички прашања. Таа беше коавтор на труд во 2022 година за конференција на УНЕСКО за управување со подземните води.
Извршниот директор на BAC Consulting, Кристијана Барсони-Арцидиаконо
Таа на нејзините профили на социјалните мрежи наведува дека е стратешки советник за големи меѓународни организации како што се Меѓународната агенција за атомска енергија (МААЕ) и хуманитарната агенција CARE, како и за фирми за ризичен капитал.
МААЕ посочи дека лице по име Барсони-Арцидиаконо било практикант во агенцијата девет месеци во 2008 и 2009 година.
Веб-страницата BAC Consulting, која стана недостапна во средата, ги опишува областите на експертиза на компанијата како „животна средина, развој и меѓународни работи“.
Нејзините профили на социјалните мрежи покажуваат дека Барсони-Арцидиаконо студирала на Лондонската школа за економија и политички науки и на Факултетот за ориентални и африкански студии. Таа има објавено и научни трудови за јонизација на водата, климатските промени и други теми од природните науки.
Барсони-Арцидиаконо, изјави за вестите за NBC дека фирмата BAC Consulting, нема никаква врска со производството на пејџери.
„Јас не ги правам пејџерите. Јас сум само посредник. Мислам дека погрешивте“, изјави таа за американската мрежа во средата.
Бугарија, во меѓувреме, рече дека ќе истражи трета компанија поврзана со продажбата на пејџерите. Агенцијата за државна безбедност ДАНС во соопштение рече дека работи со Министерството за внатрешни работи на истрага за улогата на компанија регистрирана во Бугарија, без да ја именува.
Бугарските медиуми објавија дека софиска компанија Норта Глобал ЛТД ја олеснила продажбата на пејџерите. Ројтерс не можеше да ја потврди врската со Норта, а претставниците на компанијата не одговориле на барањата за коментар. Адвокатот кој ја регистрирал компанијата во станбен блок во Софија не одговорил на прашањата на Ројтерс.
Сликите од експлодираните воки-токи покажаа етикети со името на јапонската радио-комуникациска и телефонска компанија ICOM 6208.T и личат на моделот на компанијата IC-V82.
Компанијата, која вели дека ги произведува сите свои радија во Јапонија, во четвртокот соопшти дека моделот бил произведен и испорачан на Блискиот Исток од 2004 до 2014 година, но оттогаш не било испорачано од компанијата. Оттаму посочија дека батериите за уредите исто така повеќе не се произведуваат.
Рачните радија беа купени од Хезболах пред пет месеци, приближно во исто време со пејџерите, рече извор од безбедноста.
Фирмата со седиште во Осака рече дека нејзините радио производи се сите произведени од една подружница во Вакајама, користејќи само свои делови, без производство во странство.
Компанијата претходно предупреди за фалсификувани верзии на нејзините уреди кои циркулираат на пазарот, особено за прекинатите модели.
„Не беше прикачен холограмски печат за разликување на фалсификувани производи, така што не е можно да се потврди дали производот е испорачан од нашата компанија“, се вели во соопштението, мислејќи на уредите што експлодираа во средата.
Хезболах го обвини Израел за експлозиите, ветувајќи одмазда. Анонимни американски официјални лица изјавија за странските медиуми дека израелски агенции стојат зад нападот.
Двојните бранови на експлозии ги засилија стравувањата дека Израел и Хезболах би можеле да бидат блиску до сеопфатна војна, по речиси една година ограничени прекугранични престрелки што ги принудија цивилите да избегаат од северен Израел и јужен Либан.
Израелските лидери издадоа низа предупредувања во последниве недели дека може да ги зголемат операциите против Хезболах во Либан, велејќи дека мора да бидат способни да ја вратат безбедноста и да им дозволат на жителите да се вратат во своите домови во близина на границата.
Израел почна да преместува повеќе војници на својата граница со Либан во средата како мерка на претпазливост, според портпаролот на израелските одбранбени сили.
Говорејќи пред војниците во средата, министерот за одбрана Јоав Галант рече дека Израел е „на почеток на нова фаза во војната – бара храброст, решителност и истрајност“.
Тој не ги спомна експлозивните направи, но ја пофали работата на израелската армија и безбедносните агенции, велејќи дека „резултатите се многу импресивни“.
За време на посетата на Северната команда во средата, началникот на Генералштабот на ИДФ, Херзи Халеви, предупреди дека Израел има повеќе што може да направи против Хезболах.
„Имаме многу можности што сè уште не сме ги искористиле. Ми се чини дека сме добро подготвени и ги подготвуваме овие планови понатаму“, рече тој.
