На светот му „потребна“ победата на Доналд Трамп на претседателските избори во САД, бидејќи само „силен“ американски лидер може да обезбеди „стабилност и безбедност на меѓународниот поредок“, изјави унгарскиот министер за надворешни работи Петер Сијарто во интервју за порталот Breitbart News.
Сијарто во интервју објавено доцна во неделата по европско време рече дека поранешниот претседател Трамп, доколку биде реизбран во ноември, ќе може да донесе мир меѓу Русија и Украина.
„Без претседателот Трамп, оваа војна ќе продолжи долго време, ќе резултира со многу повеќе жртви и ќе кулминира со големо уништување. Значи, нашата најголема надеж е дека ако претседателот Трамп победи на изборите во 2024 година, ќе може да постигне мир“, рече Сијарто.
Шефот на унгарската дипломатија нагласи дека „ние Унгарците даваме целосна поддршка на ова како една од ретките земји во Европа која е за мир“. „Треба да разберете дека мнозинството земји во Европа се за војна, а само мало малцинство се за мир“, додаде тој.
Сијарто рече и дека доколку стапат на сила „мировните политики“ на Трамп, „некои од овие европски земји исто така би можеле да ги променат своите позиции“.
Унгарскиот министер смета дека војната во Украина не може да се реши на бојно поле кое „може да понуди само жртви и уништување, а не решение“.
Сијарто рече дека е општо прифатено дека Украина нема да ја победи Русија, додавајќи дека „исто така знаеме дека Русија не може да го победи целиот Запад“.
Во врска со војната во Газа, пак, Сијарто истакна дека не треба да се заборавикако започна овој конфликт.
„Се случи брутален, грозоморен терористички напад и илјадници ракети беа испукани на земјата, повеќе од илјада луѓе беа убиени, а стотици беа киднапирани“, додаде тој.
Сијарто смета дека израелската воена офанзива против Хамас е од витално значење не само за безбедноста на еврејската држава, туку и за глобалната безбедност, со цел да се спречат слични напади низ светот.
Сијарто беше дел од делегацијата на унгарскиот премиер Виктор Орбан, која се состана со поранешниот американски претседател Трамп минатата седмица.
