Унгарија и Европската комисија се далеку од договор за пакетот помош од повеќе милијарди евра за Украина, и не постои сигурност дека може да се постигне договор, изјави Гергели Гуљас, шеф на Кабинетот на унгарскиот премиер.
Будимпешта моментално го блокира планот изнесен од Брисел за финансирање на Киев во износ од 50 милијарди евра (54 милијарди долари) во следните четири години. Ветото поставено од унгарскиот премиер Виктор Орбан поттикна дискусии меѓу пратениците на ЕУ за тоа како на Будимпешта да и се одземе правото на глас по ова прашање.
По владиниот состанок во четвртокот, Гуљас изјави дека ќор-сокакот на Брисел и Европската комисија за помошта за Украина „не е трагедија“, како што објави унгарскиот медиум Телекс.
Тој посочи дека може да се најде решение во рамката од 2026 година и истакна дека Унгарија „не ја отфрли можноста за поддршка на Украина на билатерална основа“. Будимпешта мора да се стреми кон добри односи со соседните земји и да гледа да ги подобри врските со Киев, потврди Гуљас.
Претходно, премиерот Орбан инсистираше на тоа дека секоја поддршка од ЕУ за Украина треба да биде предмет на годишен преглед за тоа како Киев всушност ги троши парите и побара финансирањето да се врши „надвор од буџетот на ЕУ и на годишна основа“.
„Ова е единствениот демократски став пет месеци пред изборите [јуни за Европскиот парламент]“, рече Орбан на платформата X (поранешен Твитер), сугерирајќи дека европратениците кои инсистираат на зелено светло за помошта што е можно поскоро „во суштина сакаат ги лишат правата на луѓето да донесат одлука за нивната иднина“.
Ветото на Унгарија за помошта на ЕУ за Украина наиде на остри критики од европските пратеници кои во четвртокот одобрија резолуција во Европскиот парламент, со која се осудуваат „намерните, континуирани и систематски напори на унгарската влада да ги поткопа основачките вредности на ЕУ“. Резолуцијата, исто така, повикува да се казни Орбан со суспендирање на гласачкото право на Будимпешта во ЕУ. Резолуцијата не е правно обврзувачка.
Во меѓувреме, Словачка вети дека ќе застане на страна на Унгарија и нема да дозволи поддржувачите на Киев во ЕУ да ја казнат Будимпешта за одбрана на нејзините национални интереси. Премиерот Роберт Фицо ги нарече „рационални и разумни“ барањата на Орбан за обезбедување годишна и ревидирана помош за Украина.
