Германската енергетска компанија „Uniper“ ќе започне со тестирање на подземен капацитет за складирање водород лоциран веднаш до Северното Море додека Германија се обидува да го трансформира својот енергетски систем.
Складиштето во северниот округ Крумхоерн во сојузната покраина Долна Саксонија ќе се користи за тестирање како материјалите и технологијата реагираат со овој гас. Јаглеродно неутралниот водород се очекува да игра клучна улога како „зелено“ гориво за индустријата. Експертите очекуваат голема побарувачка за магацински простор во Германија.
„Uniper“, кој неодамна беше национализиран, е најголемиот германски оператор за складирање природен гас и се гледа себеси како пионер во развојот на европската економија базирана на водород.
Областа за тестирање во Крумхоерн се наоѓа на длабочина од околу 1.700 метри, има дијаметар од 16 метри, висина од 30 метри и волумен од околу 3.000 кубни метри. Комората за складирање е погодно лоцирана, а планираната мрежа на водородни цевководи треба да оди во близина.
„Овој проект може да одигра клучна улога во зајакнувањето на германската економија базирана на водород“, рече министерот за економија на Долна Саксонија, Олаф Лис.
Благодарение на својата позиција за Северното Море и постоечката инфраструктура, Долна Саксонија ќе преземе водечка улога во енергетската транзиција на Германија, додаде министерот.
Полнењето на комората за складирање е закажано за крајот на септември. Директорот на Унипер, Френк Холшумахер, изјави дека зелениот водород ќе биде испорачан со танкери.
Доколку складирањето се покаже економски исплатливо по двегодишната тест фаза, „Uniper“ планира да ја прошири комората за комерцијална употреба, процес кој би можел да потрае три до пет години по цена од 500 милиони евра. Зголемената комора би имала капацитет од околу 250 гигават часови.
„Uniper“ поседува уште три комори во Крумхоерн кои претходно се користеа како складишта за природен гас и моментално се полни со вода. Доколку тестирањето се покаже успешно, тие би можеле да бидат пренаменети, а во областа би можеле да се изградат до шест нови комори.
До 2030 година, компанијата планира да развие капацитети за складирање на водород со вкупен капацитет до 600 гигават часови, а локациите долж водородната мрежа во покраините Долна Саксонија и Северна Рајна-Вестфалија ќе бидат тестирани.
„Uniper“ не е првата компанија која тестира складирање на водород во Германија. Енергетската компанија EWE со седиште во Олденбург веќе некое време користи локација во Рудерсдорф во близина на Берлин за да тестира складирање на водород.
