Русинот Андреј Рубљов (АТП – 6.) и Бугаринот Григор Димитров (АТП – 9.) ќе се борат за пласман во четвртфиналето на УС Опен, последниот грен-слем турнир сезонава, откако во третото коло остварија убедливи победи.
За 26-годишниот руски тенисер немаше проблеми во дуелот против Чехот Јиржи Лехечка (АТП – 38.) кого за нешто повеќе од два часа го совлада со 6-3, 7-5, 6-4.
Уште помалку проблеми имаше 33-годишниот Димитров. Му беа потребни само 99 минути за да победи со 6-3, 6-3, 6-1 против Холанѓанецот Талон Грикспур (АТП – 40.).
Кога Рубљов и Димитров ќе се сретнат на спротивните страни од мрежата в недела, тоа ќе биде нивни осми меѓусебен натпревар. Сите седум се играа на тврди подлоги, а Русинот води со 4-3. Има 1-1 во двојки на грен-слем турнирите, а Рубољов славеше уште во 2017 година на УС Опен, што беше нивен прв натпревар во двојки. Само четири ипол месеци подоцна, Димитров ја возврати услугата на Австралија Опен во 2018 година.
Рубљов ќе бара пат до трето последователно четвртфинале во Њујорк, а Димитров само еднаш беше четвртфиналист на УС Опен. Тоа беше во 2019 година кога стигна до полуфиналето. За Рубљов полуфиналето на грен-слем турнирите е неостварен сон. Зад себе има десет четврт-финалиња и десет порази во нив. Можеби ова е негова година.
Американските тениски фанови ги расположи Тејлор Фриц (АТП – 12.) кој втора година по ред стигна барем до осминафиналето на домашниот грен-слем турнир, а годинава нема полош резултат од 4. коло на четири најголеми и најважни натпревари. За да се пласира во осминафиналето му требаа точно два часа, а со 6-3, 6-4, 6-2 го совлада Аргентинецот Франциско Комесана (АТП – 108.).
