Германската економија бележи благ раст од почетокот на вториот квартал, поддржана од услужниот сектор и треба да биде поддржана од закрепнувањето на личната потрошувачка, објави во средата централната банка Bundesbank.
Економската активност најверојатно повторно ќе се зголеми благо во вториот квартал, проценуваат експертите на Bundesbank.
„Позитивните импулси“ треба да потекнуваат од личната потрошувачка и континуираното закрепнување на услужниот сектор, прогнозира Bundesbank, повикувајќи се на резултатите од истражувањето на институтот за малопродажба и угостителство ifo.
Во првиот квартал личната потрошувачка беше слаба бидејќи кај потрошувачите владееше неизвесност и покрај стабилниот пазар на труд и растот на реалните приходи, потсетува Bundesbank.
Услужниот сектор треба да забележи забележителен раст во пролетниот квартал, додаваат од германската централна банка, посочувајќи дека на почетокот од годината негов столб биле услугите кон корпоративниот сектор.
И големите потрошувачи на енергија во индустријата треба умерено да закрепнат, прогнозираат тие, посочувајќи силен раст на производството во хемиската индустрија. Автомобилската и машинската индустрија продолжуваат да опаѓаат, така што закрепнувањето во целиот индустриски сектор се уште не е на повидок.
Закрепнувањето на производниот сектор во целина во моментов е попречено од слабата побарувачка, објаснуваат тие.
„Подобрените деловни очекувања во преработувачката индустрија веројатно значително ќе го поттикнат производството само во втората половина од годината“, проценува Bundesbank.
„Фундаменталните движења покажуваат постепено и благо зајакнување на економската активност“, заклучува Bundesbank во мајскиот извештај.
Во првиот квартал, според сезонски и календарски приспособени податоци, германскиот бруто домашен производ (БДП) е зголемен за 0,2 отсто во однос на претходните три месеци кога бележи пад од 0,5 отсто.
Инфлацијата веројатно повторно ќе зајакне во мај и ќе осцилира во наредните месеци околу покачено ниво, како одраз на минатогодишната ниска споредбена основа под влијание на поволните месечни билети за јавниот превоз, проценуваат во централната банка на Германија.
