Вечерва во 18 часот ќе се оддржи седница на Собранието на Република Македонија на која пратениците ќе треба да го изберат новиот состав на Државната изборна комисија, потврдија за МИА од кабинетот на претседателот Талат Џафери.
Претходно Комисијата за изборите и именувањата на експресна седница ги утврди седуммината членови на новиот состав на ДИК, што треба да го спроведе референдумот за Договорот со Грција, на крајот на септември.
Претседателот на Комисијата Илија Димовски, ги прочита партиски усогласените имиња, што веќе му се испратени на претседателот на Собранието Талат Џафери.
Оливер Дерковски од ВМРО-ДПМНЕ е утврден за претседател на ДИК, а Дитмире Шеху од ДУИ потпретседател.
Елизабета Постоловска од ВМРО-ДПМНЕ, Јанакие Витановски, Борис Кондарко и Радица Ристеска од СДСМ, како и Енвер Салиу од Беса ќе бидат членови на ДИК.
На вечерашната седница на Собранието, покрај изборот на членови на ДИК, ќе бидат разгледани и измените во законот за финансирање на политички партии , на Законот за Влада и измените на Изборниот законик, според договореното на лиодерската средба во понеделникот.
МИА