Јужнокорејскиот претседател Јун Сук Јеол и неговата сопруга ќе ја посетат Јапонија од 16-ти до 17-ти март на покана на Токио, соопшти неговиот кабинет во четвртокот, што е прва ваква посета во последните 12 години откако Сеул објави план за ставање крај на долготрајниот спор меѓу двете земји, поради присилна работа особено сексуалната експлоатација на Корејките во текот на јапонската окупација.
Јужна Кореја во понеделникот објави дека нејзините компании ќе ја исплаќаат компензација на жртвите на принудна работа под јапонско колонијално владеење од 1910 до 1945 година, со цел да се стави крај на спорот што ги поткопа напорите предводени од САД за обединет фронт против Кина и Северна Кореја.
Јун ќе одржи самит со јапонскиот премиер Фумио Кишида, соопшти кабинетот на Јун, нарекувајќи го настанот „важна пресвртница во подобрувањето и развојот на односите меѓу Јужна Кореја и Јапонија“.
Јужна Кореја е важен сосед со кој Јапонија треба да соработува во решавањето на различни прашања во меѓународната заедница, изјави на брифинг јапонскиот главен секретар Хироказу Мацуно.
„Се надевам дека со оваа посета на Јапонија односите меѓу Јапонија и Кореја ќе се развиваат врз основа на пријателски и кооперативни односи кои постојат од нормализацијата на дипломатските односи“, рече Мацуно.
Канцеларијата на Јун соопшти дека Јужна Кореја се надева дека ќе ги прошири различните безбедносни, економски и културни полиња и ќе ја ревитализира размената меѓу луѓето во двете земји „за да го надмине несреќното минато и да се движи кон иднината“.
Јужнокорејското Министерство за одбрана во вторникот соопшти дека ќе работи со Јапонија на подобрување на безбедносната соработка, вклучително и трилатералните односи со САД. Двете земји оваа седмица се согласија да преговараат за крај на ограничувањата за извозот на клучните електронски компоненти.
Јун најверојатно ќе се врати од Токио со напредок во усогласувањето на извозните контроли и обновената јапонска поддршка за пристапот на Сеул кон Северна Кореја, смета Леиф-Ерик Исли, професор по меѓународни студии на Универзитетот Евха во Сеул.
Јун на почетокот на март рече дека соработката со САД и Јапонија станала поважна од кога и да е претходно за надминување на растечките нуклеарни закани на Северна Кореја и другите кризи.
Кишида би можел да побара поддршка од Јужна Кореја за развивање на одбранбената положба на Јапонија и трилатерална координација со Соединетите држави за да се зачува поредокот заснован на правила во Азија, додаде Исли.
„Нема да се решат сите историски прашања бидејќи помирувањето меѓу демократиите е процес, а не договор“, рече Исли. „Но, двајцата лидери се решени да ја подобрат соработката во трговијата и безбедноста“, додаде тој.
Односите паднаа на најниско ниво во последните децении, откако Врховниот суд на Јужна Кореја во 2018 година им нареди на јапонските компании да платат компензација на поранешните принудни работници. Петнаесет Јужнокорејци добија такви случаи, но ниту еден не доби компензација. Јапонија смета дека прашањето е решено со договорот од 1965 година, а јапонскиот министер за надворешни работи Јошимаса Хајаши во понеделникот изјави дека ставот на јапонската влада не е променет.
Вашингтон ги притисна своите сојузници во двете земји да се помират и ги нарече последните најави „револуционерни“, но неколку жртви веќе најавија дека ќе одбијат компензација, со што се отвора теренот за нови политички и правни битки. Американскиот претседател Џо Бајден ќе го прими Јун во државна посета на 26-ти април, соопштија во вторникот Белата куќа и канцеларијата на Јун.Тоа ќе биде прва државна посета на јужнокорејски претседател на САД од 2011 година.
