Претседателот на Собранието на Република Македонија, Трајко Вељаноски по повод еврејскиот празник Рош Хашана, упати честитка до Претседателот на Еврејската заедница во Република Македонија, Берта Романо – Николиќ и до припадниците на Еврејската заедница во Република Македонија.
Во продолжение проследете го интегралниот текст од честитката на Вељаноски.
Во пресрет на големиот празник Рош Хашана имам чест и особено задоволство од мое лично име и од името на пратениците во Собранието на Република Македонија, Вам и на сите припадници на Еврејската заедница, да Ви упатам најискрени желби за добро здравје и успешна Нова Година.
Нашата држава Република Македонија и ние како граѓани посветено работиме на подобрување и развој на сите заедници, вклучувајќи ја и еврејската заедница. Ја користам оваа прилика да истакнам дека вредностите кои ги негува еврејската заедница претставуваат значаен дел во нашите заеднички заложби за зачувувањето на основните вредности. Тие вредности подразбираат негување на меѓучовечките односи, толеранција и соживот помеѓу сите граѓани во Република Македонија. Исто така, слободно можам да истакнам дека голем е вашиот придонес во оформувањето и создавањето на современата македонска држава.
Уште еднаш Ви го честитам претстојниот празник и Ви посакувам Новата година според еврејскиот календар, да биде поуспешна, исполнета со мир, добросостојба и просперитет.
Шана Това