Премиерот Никола Груевски со семејството синоќа присуствуваше на велигденската света литургија во црквата „Св. Великомаченик Георгиј“ во Дојран.
Премиерот со семејството во петокот присуствуваше и на литургија за оплакување на Исус во црквата Св. Ѓорѓи во Дојран.
По повод големиот христијански празник Велигден тој испрати честитка до поглаварот на МПЦ-ОА,Архиепископот охридски и македонски г.г. Стефан и до сите православни верници во Македонија и во дијаспората во која им посака среќни и благословени празнични денови.
-Велигден е денот кога се празнува Христовата жртва за човековото спасение, тоа е празник на љубовта, почитувањето на животот, и вербата во спасението. Велигден е длабоко вкоренет во нашата православна традиција и меѓу православните граѓани кои со голема радост и почит пристапуваат кон празнување на овој ден. Велигден е и празник кој во себе ја носи универзалната и цивилизациска порака на љубов и взаемно почитување, на соживот и разбирање. Секој човек поминува низ мигови на искушенија, наш предизвик е да ја пронајдеме силата во себе да се издигнеме над предизвиците на телото и умот и со божја волја да го избереме вистинскиот пат, патот на почитување, на сакањето, да си помагаме и да не си грешиме или да си предизвикуваме зло еден на друг. Примајќи го зборот божји во нашите срца, даваме мир и спокој на душата. Обединети околу овие вредности треба да чекориме напред, сите заедно да придонесуваме во напредокот и развојот на нашата заедничка држава Република Македонија, се вели во честитката на Груевски.