Во рамките на културната соработка што долго време ја остварува скопската гимназија Никола Карев, под менторството на професорката Емилија Ристановска, се случи настапот на бендот Црно собрание (составен од нивни ученици-музичари) во Белград, во Дом омладине. Постигнат е голем успех – први награди за гитаристите и вокалите. Краткиот настап, во условите на натпреварувачкиот карактер на фестивалот, составен од само три песни, една авторска и две од други бендови, сериозен по моќноста, зрелоста и силата, е настап што може да нѐ радува како македонска нација и култура.
Започнале со “Слобода или ништа“ од српските Partybrakers, за јасно да покажат однос кон културните достигања на домаќините, но и да го вкотват значењето на слободата пренесено преку нежниот вокал на Мона Ристова.
Втората песна што ја извеле е култната Кељав дабар, соработка на Last Expedition и Чиста околина. Бендот буквално “развалил“ и на песната ѝ дале сосем ново читање. Енергијата овде е стравична и општиот впечаток е дека песната звучи посвежо и посовремено од предложената класика направена во 1994.
Спојот со надреалистичкиот текст и рецитаторската предлошка на Чиста околина одново ја пресоздал идејата на песната, ѝ вдахнале нов живот, ко да била направена за овие деца и ваков женски вокал. Токму тој вокал на младата Доротеја Солунчева е неверојатен, агресивен, снажен и експлозивен, а e во единство со нејзиното ненаметливо и харизматично однесување, движење, красотно држење и изглед. Беспрекорна раперска техника и невиден vibe. Би рекла женски исклучителен дури и во светски рамки. Гитаристите Павел Петковски и Кирил Лазаревски, басистот Мартин Атанасов, прекрасни, спонтано животни, усогласени, небаре свират деценија заедно. Тапанарката Дарија Манева со високо ниво на уметнички талент и страст во изведбата.
Всушност, најмногу радува нивната авторска инструментална песна (очигледно сѐ уште недовршена со текст и вокали), изведена како последна во низата, зашто ги покажува контурите на една нова талентираност и креативност (деца отприлика 16-17 години), вкотвена во минатите и современи текови на квалитетната светска андерграунд музика, со референци на македонска рок историја. Прв изблик на она специфично нивното.