Јужнокорејскиот претседател Јун Сук Јеол прогласи вонредна состојба во вторникот вечерта, во потег што ги запрепасти Јужнокорејците и предизвика краток обид на војниците да влезат во парламентот, но пратениците и демонстрантите брзо одговорија на најсериозниот предизвик за демократијата во таа земја од осумдесеттите години на минатиот век.
Претседателот на парламентот прогласи неважечка вонредна состојба, а пратениците со големо мнозинство гласаа за неа рано наутро во средата по корејско време.
На потегот на Јун, за кој рече дека е насочен кон неговите политички непријатели, гласно се спротивстави дури и лидерот на неговата партија, Хан Донг-Хун, кој беше присутен на гласањето во парламентот и се судри со Јун околу начинот на кој претседателот се справува со неодамнешните скандали.
Претходно, на телевизиските снимки во живо беа прикажани војници со шлемови, кои се чини дека се задолжени за воведувањето вонредна состојба, како се обидуваат да влезат во зградата на парламентот, а беа забележани и вработени во парламентот како се обидуваат да ги оттурнат војниците прскајќи ги со пена од противпожарни апарати.
Во вторникот вечерта, Јун рече дека опозициските партии го зеле парламентарниот процес како заложник. Тој вети дека ќе ги искорени „бесрамните про-севернокорејски антидржавни сили“ и рече дека нема друг избор освен да преземе мерки за заштита на уставниот поредок.
Набргу откако Јун ја објави својата изјава на телевизија во живо, луѓето почнаа да се собираат пред зградата на парламентот, некои од нив скандираа „Укинете ја воената состојба! „Уапсете го Јун Сук Јеол“, извикуваа другите.
Армијата соопшти дека ќе бидат забранети активностите на парламентот и политичките партии, а медиумите и издавачите ќе бидат под надзор на воената команда.
Јун не наведе никаква конкретна закана од Северна Кореја. Наместо тоа, тој се фокусираше на неговите домашни политички противници.
Тоа е првпат од 1980 година во Јужна Кореја да биде прогласена вонредна состојба. Јужна Кореја имаше серија авторитарни лидери во својата рана историја, но се смета за демократска земја од 1980-ите.
Корејската валута вон остро падна во однос на американскиот долар. Претставник на централната банка изјави дека подготвува мерки за стабилизирање на пазарот доколку е потребно. Министерот за финансии Чои Санг-мок свика итен состанок со највисоките економски претставници, изјави за Reuters неговиот портпарол во СМС порака.
Претходникот на Јун, Мун Џе-ин од Демократската партија, во објава на Х рече дека демократијата во земјата е во криза.
„Се надевам дека Националното собрание ќе дејствува брзо за да ја заштити нашата демократија од распаѓање. Ги замолувам граѓаните со заеднички сили да ја заштитат и спасат демократијата и да му помогнат на Народното собрание нормално да функционира“, напиша тој во објавата.
САД се во контакт со владата на Јужна Кореја и внимателно ја следат ситуацијата, изјави портпаролот на Белата куќа. Приближно 28.500 американски војници се стационирани во Јужна Кореја за да ја заштитат од комунистичка Северна Кореја.