Еквадорскиот обвинител, кој го истражува минатонеделниот напад врз едно локално телевизиско студио, е застрелан. Преземањето на ТВ станицата беше емитувано во живо, при што неколку вработени беа држени како заложници од вооружени лица.
Сезар Суарез, обвинител за провинцијата Гуајас, беше убиен во средата во Гвајакил, наводно застрелан најмалку 20 пати додека патувал низ северниот дел на градот.
„ Организираните криминални групи, криминалците, терористите нема да ја спречат нашата посветеност“, рече јавната обвинителка Дијана Салазар.
Сликите добиени од АФП наводно покажуваат дека возилото на обвинителот е перфорирано со дупки од куршуми на улица во Гвајакил. Во интервју за локалните медиуми претходно оваа недела, Суарез рече дека обично не патувал со полициски телохранител.
Според неколку медиумски извештаи кои се повикуваат на владини извори, Суарез ја водел истрагата за нападот на ТВ станицата минатиот вторник, при кој маскирани вооружени лица упаднале во студиото вооружени со пушки и експлозиви и земале заложници.
По краткиот судир со органите на редот, вооружените безбедносни сили влегле во зградата и привеле 13 напаѓачи.
Заложничката криза дојде кога Еквадор западна во хаос среде бран на насилство поврзано со организираниот криминал, со инциденти со киднапирање во универзитет, болница, затвори и полициски станици. Криминалните банди, наводно, извршиле координирани напади низ целата земја, поставувајќи експлозиви, земајќи заложници вклучително и десетици затворски чувари и полицајци во три града. Во нападите загинаа најмалку 20 лица.
Како одговор, претседателот Даниел Нобоа прогласи национална вонредна состојба и распореди околу 22.000 безбедносни службеници за одржување на редот, наложувајќи затворање на училиштата и полициски час низ целата земја.
Пред неговото убиство во средата, Суарез наводно ги сослушувал 13-те вооружени лица уапсени по инцидентот во ТВ студиото и работел на утврдување кој го наредил нападот.
Тој претходно работел на голем број други случаи од висок профил во кои се вмешани нарко босови, организиран криминал и владина корупција.
https://www.youtube.com/watch?v=0hyDjE1qj6A
