Двократниот гренд-слем шампион на Вимблдон, Енди Мареј, се повлече од сингл конкуренцијата и ќе игра со својот брат Џејми во двојки, соопшти во вторникот менаџерскиот тим на 37-годишниот тенисер.
Мареј неодамна беше опериран за отстранување на цистата на ‘рбетот која ги притискаше неговите нерви поради што ја губеше контролата и силата на десната нога.
„За жал, и покрај тоа што работеше неверојатно напорно на неговото закрепнување од операцијата пред нешто повеќе од една недела, Енди донесе многу тешка одлука да не игра сингл оваа година. Како што можете да замислите, тој е крајно разочаран, но потврди дека ќе игра двојки со Џејми и со нетрпение чека да се натпреварува за последен пат на Вимблдон“, се вели во соопштението на тимот на Мареј.
Во вторникот требаше да игра со Чехот Томаш Мачач во сингл.
Мареј, кој го заврши 77-годишното чекање на Велика Британија за титулата на Вимблдон во 2013 година и повторно ја освои титулата во 2016 година, претходно изјави дека најверојатно нема да ја продолжи кариерата по оваа година и дека би можел да се пензионира на Олимписките игри во Париз.
