Воено– политичкиот аналитичар, Благоја Марковски во емисијата „Топ Тема“ го коментираше назначувањето на Џезаир Шаќири (Командант Хоџа) за надворешен соработник од областа на внатрешната безбедност и борба против радикализмот на премиерот Зоран Заев.
-Не само што се работи за личноста која била вклучена во настаните во кризата во 2001, туку од аспект на тоа какво е неговото социјално однесување после 2001 година па се до вчерашниот ден да кажеме. И тука очигледно ќе дојдеме до факт дека неговото однесување главно се карактеризира како асоцијално однесување во општеството. Тој без оглед на сите можности кои државата им ги пружи на лицата кои беа вклучени во 2001 година во кризата не најде за сходно да се приклучи кон ресоцијализација и вклучување во општествените текови туку се одметна во Танушевци, се самопрогласи за некаков кмет во тој дел на територијата и не беше достапен за никој од органите. Ниту во смисла за ресоцијализација ниту во смисла на негова одговорност за сето она што го правеше. Ако појдеме од овој факт навистина овде е доста проблематично неговото назначување или донесувањето на одлуката на премиерот Заев за негово назначување за негов советник, и од една друга причина што тој со своето стручно образование не кореспондира со обврските кои пред него ги поставува таа одлука на Премиерот, односно јас не сум сигурен дека ќе може да даде свој придонес за демократизација на нашето општество како советник на премиер истакна Марковски.
Премиерот Заев изјави дека командантот Хоџа е вработен во Владата за да заработи плата за да го прехрани своето многубројно семејство.
Според Марковски Владата не е социјална институција која згрижува социјални случаи.
-Тоа што премиерот денеска го изјави дека командантот Хоџа дека може да биде корисен во смисла на сузбивање на криминалитетот и така натаму, тоа апсолутно не може да стои затоа што ние имаме стручни служби, органи, гранична полиција, полиција која треба многу добро да го познава теренот, многу повеќе од самиот Шаќири и од друга страна не чув јас до денес дека Владата е социјална институција каде што социјално згрижува граѓани. За тоа постојат други структури, други органи во државата кои треба да се грижат, потенцираше Марковски.
