Лицемерието на премирот Димитар Ковачевски кон граѓаните го отсликува целокупното негово владеење, имено донесе мерка која ни самите во Владата не ја почитуваат, притоа претставувајќи се за спасител во ситуација кога дозволи сѐ да поскапе во Македонија, велат од ВМРО-ДПМНЕ.
„Ковачевски во Влада набавува леб поскап за 30 до 100 отсто повеќе од цената која самиот ја пропишува, односно плаќа 41,4 денари за 450 грама за белиот леб, а за белиот леб со продолжен рок плаќа нешто под 80 ден.
ВМРО-ДПМНЕ уште пред една година предупредуваше дека ќе дојде до оваа ситуација, но Ковачевски не сакаше да го заштити стандардот на граѓаните со соодветни мерки. Со нашите предложени мерки ќе ги наполнеше и зголемеше стоковите резерви, ќе им помогнеше на производителите и ќе спречеше ценовен шок за граѓаните.
Наместо тоа, Ковачевски реши да ја поскапи струјата и дозволи цените вртоглаво да растат, стои во партиското соопштение и се додава:
„Ковачевски ако се грижеше за граѓаните немаше да дозволи инфлација од 20% во Македонија, стандардот на граѓаните да падне, а во исто време се живо да поскапе.
Затоа провидна е глумата и лицемерието на власта. Кога ВМРО ДПМНЕ ќе ја предводи следната Влада, ќе ги направи сите напори да го подигне стандардот на граѓаните, преку одржливи мерки, кои нема да бидат од денес за утре“, се вели во реакцијата.
