Уште пред еден месец лидерот на ВМРО-ДПМНЕ Христијан Мицкоски отворено предупредуваше за пропусти во постапката за реализација на проектот „Чебрен“, алармиравме дека Владата неколку пати ги менувала одлуките поврзани со изградбата на хидроцентралата „Чебрен”, со што создаде сложена ситуација и потенцијално голем проблем во иднина, реагираат во средата од ВМРО-ДПМНЕ.
Притоа од опозициската партија потседуваат дека во тој период владејачката СДСМ тврдеше дека таквитте критики се „малициозни“ и „невистинити“, а само еден месец подоцна проектот пропадна.
„Прво Владата на Зоран Заев на 24 декември 2019 година донела одлука за отпочнување на постапката, во која се вели дека на компанијата што ќе ја добие оваа набавка ќе и биде отстапена и хидроцентралата „Тиквеш” три месеца откако ќе почне изградбата“, се наведува во реакцијата на ВМРО-ДПМНЕ.
Притоа го цитираат поранешниот лидер на СДСМ и премиер кој во таа пригода рече дека „Почнува да се гради, три месеца потоа го добиваат ‘Тиквеш’, па потоа треба да изгради 400-киловолтна трафостаница ‘Мариово’ каде што ќе се поврзе хидроцентралата“.
Опозициската партија потсетува и дека набрзо по оваа изјава власта ја презема техничката влада предводена од Оливер Спасовски, која носи нова одлука на 4 февруари 2020, со која се бришат сите овие обврски наведени во првичната одлука. А две недели подоцна е објавен и јавниот повик, и во него избришаните обврски повторно се појавуваат.
„Ситуацијата дополнително се комплицирала со тоа што во меѓувреме е објавен повикот за компаниите да учествуваат во пред квалификацијата, во кој се вели дека победничката компанија ќе ја добие ХЕЦ „Тиквеш” три месеци откако ХЕЦ „Чебрен” ќе почне со работа, односно ќе биде завршена градбата. Тоа е голема разлика бидејќи ако од прилика таа градба трае шест години, а ХЕЦ „Тиквеш” произведува отприлика 140-150 илјади мегават часови, пазарната цена е некаде околу 120 евра мегават час, но таа е пикова енергија и е уште поскапа, но еве да речеме 120 евра мегават час, помножено со 6 години ние добиваме сума од 100 милиони евра“, се посочува во реакцијата.
Од ВМРО-ДПМНЕ истакнуваат дека тоа зборува оти во кус период биле донесени повеќе документи што не се поклопувале еден со друг, што предизвика проблем.
„Конфузијата продолжила и понатаму во постапката, па така на 14 септември минатата година сегашната влада ја избира групата „ППЦ-Архиродон”, односно грчкото електростопанство, како најповолен понудувач, повикувајќи се на одлуките пред три и пол години во кои ХЕЦ „Тиквеш” еднаш се дава три месеци по почетокот на градбата, а вториот пат се брише. Владата во обид да си направи свој нов бонбона бизнис од 100 милиони евра дополнително се заплетка“, заклучуваат од ВМРО-ДПМНЕ.
