Во понеделникот на Волстрит се тргува внимателно, бидејќи инвеститорите не сакаат да преземаат ризици пред новите податоци за инфлацијата, извештаите на претседателот на централната банка (Fed), Џером Пауел и првите квартални деловни резултати на компаниите и банките.
Индексот Dow Jones загуби 0,08 отсто, на 39.344 поени, додека S&P 500 порасна за 0,10 отсто, на 5.572 поени, а Nasdaq 0,28 отсто, на 18.403 поени.
Малите движења на индексот се резултат на претпазливоста на инвеститорите пред новите податоци за инфлацијата во САД. Во четврток ќе биде објавен извештај за потрошувачките цени во јуни, а во петок извештајот за цените на производителите. Инвеститорите се надеваат на натамошно ублажување на инфлаторните притисоци, што би отворило простор за американската централна банка да ги намали каматните стапки.
Податоците за вработеноста во САД објавени во петокот покажаа дека пазарот на труд постепено слабее, што може да доведе до намалување на притисокот врз растот на платите и потрошувачката, што, пак, би довело до слабеење на инфлаторните притисоци. Благодарение на тоа, зајакнаа пазарните шпекулации дека Fed ќе ги намали каматните стапки веќе во септември.
Но, претставниците на Fed последните месеци велат дека инфлацијата останува над целта од 2 отсто и дека треба да бидат трпеливи за намалување на каматните стапки. Поради оваа причина, извештајот на претседателот на централната банка Џером Пауел до Конгресот за состојбата на економијата ќе биде внимателно следен оваа седмица.
Дополнително, на крајот од седмицата започнува сезоната на објавување на кварталните деловни резултати на компаниите и банките. Аналитичарите анкетирани од Reuters проценуваат дека заработката по акција на компаниите од индексот S&P 500 пораснала во просек за 10,1 отсто во вториот квартал, по растот од 8,2 отсто во претходниот квартал.
И на европските берзи вчера паднаа цените на акциите. Лондонски FTSE индексот ослабе за 0,13 отсто, на 8.193 поени, додека франкфуртски DAX се лизна за 0,02 отсто, на 18.472 поени, а париски CAC 0,63 отсто, на 7.627 поени.
