Повеќе од илјада членови на некоја од италијанските организирани криминални организации моментално се активни во Германија, соопшти во понеделникот германското Министрство за внатрешни работи.
„Врз основа на податоците на сојузните и покраинските министерства за внатрешни работи, доаѓаме до заклучок дека 1.003 активни членови на една од италијанските организирани криминални организации моментално живеат во Германија“, се вели во соопштението за печатот на Министерството за внатрешни работи, одговарајќи на прашање од пратеничката група на Зелените во Бундестагот.
Од 1.003 членови на мафијата во Германија, 519 припаѓаат на калабриската Ндрангета, 134 на сицилијанската Коза ностра и 118 на неаполската Камора.
Покрај овие познати гранки на мафијата, во Германија се активни 33 членови на Стида, сицилијанска група и 37 членови на криминална организација од провинцијата Апулија, додека, како што се наведува, 162 членови на мафијата не можат да се класифицираат во која и да е од подгрупите.
Според соопштението, покрај трговијата со дроги, мафијата е најактивна во гастрономијата и продажбата на храна, како и во трговијата со автомобили, а кривичните дела се однесуваат на даночно затајување, перење пари и злоупотреба на стимулативни средства.
Претставникот на партијата на Зелените во комисијата за внатрешна политика на Бундестагот, Марсел Емерих, изјави дека Германија, поради сѐ уште големото присуство на готовина во деловниот свет, е погодна за перење пари.
„Германија е пералница на пари во Европа“, рече Емерих.
По падот на Берлинскиот ѕид во 1990-те години, германските медиуми пишуваа за зголемена активност на мафијата на истокот од Германија, каде по повторното обединување имаше голема потреба од отворање ресторани, особено со италијанска кујна, а државата инвестираше милијарди во економските стимулации.
Мафијата во Германија се држи подалеку од јавноста, а еден од ретките случаи кога за италијанската мафија многу се известуваше се случи во 2007 година, кога во италијански ресторан во Дуизбург беа убиени шест членови на едно семејство од Калабрија.
