Жена починала во Германија како последица од несакан ефект по вакцинирањето против коронавирусот со препаратот на „AstraZeneca“, соопштија во четвртокот властите на округот Херфорд во сојузната покраина Северна Рајна-Вестфалија, повикувајќи се на резултатите од обдукцијата.
Според Институтот за иминулогија и трансфузиологија при Универзитетот во Грајсфалд, имунолошкиот одговор на вакцината резултирал со смрт на 32-годишна жена. Како причина за смртта е идентификувано нарушување на коагулацијата на крвта со церебрална хеморагија, покажале резултатите од обдукцијата.
Жената починала на 9-ти март, неколку дена откако ја примила вакцината против Covid-19. По пријавувањето на смртниот случај, здравствените власти наредиле обдукција за утврдивање на точната причина за смртта.
Употребата на вакцината на англо-шведската фармаколошка лабораторија „AstraZeneca“ беше целосно прекината на 15-ти март во Германија, како мерка на претпазливост по пријавите на тромбоемболиски несакани ефекти поврзани со вакцинацијата. Подоцна, откако Еврпопската агенција за лекови (ЕМА) објави дека вакцината е безбедна и ефикасна, како и дека полезноста далеку ги надминува ризиците од вакцинирањето, Германија на 19-ти март продолжи со употребата на вакцината.
Постојаната комисија за вакцинации (STIKO) при референтниот Институт „Роберт Кох’ на 30-ти март направи измена во препораките за употреба на вакцината на „AstraZeneca“, и сега таа во Германија е наменета за лица над 60 години. Помладите од 60 години кои ја примиле првата доза од вакцината на „AstraZeneca“ ќе бидат ревакцинирани со препаратите на „Pfizer/BioNTech“ и на „Moderna“, соопштија од STIKO.
