Во кујната на Нетпрес денеска одлучивме да подготвиме чорба со компир и пилешко месо и за десерт ролат обланда со суво овошје
Потребни состојки
500 гр пилешки гради
1 кромид
2-3 чешниња лук
2 моркови
Компир
Зачини
Запршка
Масло за јадење
1 лажица црвена пиперка
2 лажици брашно
Подготовка
На малку масло пржете ги лукот и кромидот. Кога кромидот ќе стане слаткаст, додајте го пилешкото месо исечено на коцки и морковот. Пропржете се’ заедно, додајте ги зачините, чаша вода и варете.
Кога месото ќе омекне, додајте зеленчук по желба и компир исечен на коцки. Додајте вода и гответе 25 минути односно додека компирот не се свари. Посолете по потреба
Кога чорбата ќе биде речиси готова, подгответе запршка. На малку масло пропржете го црвениот пипер, додајте брашно и брзо мешајте за да се згрутчи. Додајте вода од чорбата и мешајте додека не зоврие. Потоа запршката ставете ја во чорбата, промешајте и продолжете да гответе уште десетина минути.
Чорбата пред крај зачинете ја.
За десерт се решивме за обланда ролат со суво овошје
Состојки
3-4 кори обланда
300 гр маргарин
250 гр суви сечкани смокви
200 гр мешавина од разно суво овошје
200 гр сечкани ореви, лешници, бадеми
2 реда чоколадо за готвење
2 дл сок од портокал (може и некој друг)
300 гр мелени бисквити
Подготовка
На тивок оган истопете го маргаринот додајте ја чоколадата, а потоа смоквите и останатато суво овошје. Промешајте па додадете ги сечканите ореви, лешници и бадеми. Сето тоа полека оставете го да се крчка на тивок оган со повремено мешање. На крајот додадете мелени бисквити. Во меѓувреме подгответе ги корите обланда.
Навлажнете една чиста крпа и во неа замотајте една кора обланда. Кога ќе омекне доволно за да може да се витка, а да не се крши, ставете од филот по неа. Потоа цврсто свиткајте во ролат. Ролатот потоа замотајте го во алуминиумска фолија. Постапете исто и со останатите кори па ставете ги малку во замрзнувач за да се стегне, а потоа ставете ги во фрижидер. Најдобро е да ги послужите следниот ден.
Пријатен апетит!
