Американскиот претседател Џо Бајден во вторникот последен пат им се обрати на светските челници во Обединетите нации, изјавувајќи дека војната на Русија во Украина е неуспешна и дека дипломатското решение меѓу Израел и либанската милиција Хезболах сè уште е можно.
Бајден излезе на говорницата во салата на Генералното собрание на ОН во време кога војните во Украина, Појасот Газа и Судан се во тек и веројатно ќе продолжат и по крајот на неговиот мандат, кој завршува во јануари 2025-та.
Се обиде да ги намали напнатостите бидејќи речиси едногодишната војна меѓу Израел и палестинското движење Хамас се чини дека ќе се прелее во Либан, каде Израел нападна повеќе од илјада цели на шиитското движење Хезболах во понеделникот.
„Сеопфатната војна не е во ничиј интерес. Дури и ако ситуацијата ескалирала, сепак е можно дипломатско решение“, рече тој на Генералното собрание со 193 земји-членки.
Бајден доби аплауз кога ги повика Израел и Хамас да ги финализираат условите за договорот за прекин на огнот и ослободување на заложниците предложени од Соединетите држави, Катар и Египет.
Мандатот на Бајден беше обележан и со руската инвазија во Украина во февруари 2022 година. Украинскиот претседател Володимир Зеленски беше во салата за да го слушне Бајден како ја нагласува американската поддршка за неговата земја.
„Добрата вест е дека војната на (рускиот претседател Владимир) Путин не успеа да ја постигне својата централна цел. Тој се обиде да ја уништи Украина, но Украина е сè уште слободна“, рече Бајден.
„Не смееме да се заморуваме, не смееме да гледаме настрана и нема да попуштиме во нашата поддршка за Украина додека Украина не победи со праведен, одржлив мир“, додаде тој.
Русија контролира речиси една петтина од Украина, вклучително и околу 80 отсто од областа Донбас. Според руските воени блогери и државните медиуми, руските сили почнале ново напредување во градот Угледар во источна Украина, кој се спротивставува на руската офанзива од почетокот на војната.
Зеленски на Бајден ќе му го претстави новиот украински пензиски план кога ќе се сретнат во четврток во Вашингтон. Американскиот функционер рече дека планот најверојатно ќе биде сличен на претходните планови и ќе бара повеќе оружје и поддршка за украинската борба.
Во вторникот, Бајден, исто така, ја нагласи наводната закана од Иран.
„Заедно мораме да ги лишиме неговите терористички посредници од кислород и да се погрижиме Иран никогаш да не стекне нуклеарно оружје“, нагласи тој.
Тој додаде дека САД се обидуваат одговорно да се справат со конкуренцијата од Кина. Подготвени сме да соработуваме за итни предизвици“, рече тој.
„Неодамна ја продолживме соработката со Кина за да го запреме протокот на смртоносни синтетички наркотици. Ја ценам таа соработка. Таа е важна за луѓето од мојата земја и за многу други ширум светот.
Бајден имаше и остри зборови за лидерите на завојуваните страни во Судан: „Стоп за оваа војна сега“.
Предизвици за следниот американски претседател
Говорот на Бајден во ОН е централниот дел на неговата дводневна посета на Њујорк, која вклучува говор за климата подоцна во вторник и средба во Вашингтон со виетнамскиот претседател То Лам.
Бајден се обидува да ги продлабочи врските со стратешката југоисточна азиска земја и производствен центар за да се спротивстави на Русија и Кина, со кои Виетнам исто така одржува врски.
Украина и Русија, Газа, Иран и Кина најверојатно ќе останат предизвици за идниот американски претседател, без разлика дали станува збор за потпретседателката на Бајден Камала Харис од редовите на демократите или поранешниот републикански претседател Доналд Трамп.
Позицијата на потпретседателката за надворешната политика е во голема мера слична на онаа на Бајден, но таа зазеде нешто поцврст став за десетици илјади загинати Палестинци и хуманитарната криза во Појасот Газа уништена од израелските напади.
Трамп, кој има повеќе изолационистички тенденции, не покажа ентузијазам кога станува збор за поддршката на Украина во одбраната од Русија и е цврст поддржувач на израелскиот премиер Бенјамин Нетанјаху, кој одамна има влошени односи со демократите на Бајден.
Бајден изрази цврста поддршка за Израел во неговиот обид да ги уништи милитантите на Хамас во Газа, но досега не успеа да преговара за договор за прекин на огнот и ослободување на заложниците, ниту пак има знаци за напредок во преговорите.
Под водство на Бајден, САД испратија американско оружје во вредност од милијари долари во Украина и ги собраа сојузниците од НАТО да застанат во солидарност со Киев. Но, конфликтот во Украина во голема мера се опишува како ќор-сокак, при што Русија држи делови од источна Украина што ги зазеде на почетокот на војната.
