Првото големо судење поврзано со изградбата на згради кои се урнаа во катастрофалниот земјотрес во февруари 2023 година, во кој загинаа повеќе од 50.000 луѓе, во овој случај хотелот „Исијас“ во Адијаман, започна во Турција во средата.
Според турските медиуми, пред судот во Адијаман, на југоистокот на земјата, се појавија 11 обвинети, меѓу кои и сопственикот на хотелот, а обвинети се за „свесна небрежносте“ при надзорот на изградбата на десеткатница која се урна во земјотрес, при што загинаа 72 лица, меѓу кои 42 адолесценти, кипарски Турци, кои биле на спортски натпревар.
Според обвинението, најмалку еден од катовите на хотелот бил незаконски дограден. Со вештачењето е утврден и многу слабиот квалитет на употребениот градежен материјал. Обвинетите се соочуваат со повеќе од 20 години затвор.
Градот Адијаман се наоѓа на помалку од 100 километри од епицентарот на земјотресот со магнитуда од 7,8 степени според Рихтер кој се случи на 6 февруари 2023 година. Градот беше уништен во земјотресот. Во земјотресот загинаа повеќе од 50.000 луѓе во Турција и 6.000 во Сирија.
Уапсени се повеќе од 260 лица кои учествувале во изградбата на зградите кои се урнаа во земјотресот, а дел од нив се обиделе да побегнат од Турција. Така, градежникот на 12-катница во Антакија наречена „Ренесансна резиденција“, чии неколку стотици жители загинаа под урнатините, беше уапсен на аеродромот во Истанбул на 10-ти февруари додека се обидувал да побегне во Црна Гора.
Турскиот претседател Реџеп Тајип Ердоган не претрпе политичка штета од земјотресот и беше реизбран неколку месеци подоцна. Ердоган за големиот број жртви во земјотресот ги обвини градежните претприемачи кои им плаќале на локалните инспектори за да можат да користат евтини материјали и незаконски да доградуваат подови на зградите.
Критичарите на Ердоган возвраќаат дека повеќето од големите градежни компании во земјата се тесно поврзани со владејачката Партија на правдата и развојот (AKP).
