Инфлацијата во Обединетото кралство неочекувано се намали во август бидејќи притисоците врз трошоците за живот на домаќинствата продолжија да се намалуваат. Индексот на потрошувачките цени, кој ги следи нивните годишни промени, падна на 6,7 отсто во август од 6,8 отсто во јули.
Ова е пониско од очекувањата на британските економисти, кои предвидуваа зголемување на инфлацијата до седум отсто, пренесува Гардијан. Неочекуваниот пад на инфлацијата би можел донекаде да го намали притисокот врз Банката на Англија при овонеделната одлука за можно зголемување на каматните стапки.
Иако инфлацијата е сè уште три или повеќе пати повисока од целта од два проценти, британскиот канцелар на финансии Џереми Хант го поздрави нејзиниот пад во август како знак дека економската стратегија на владата функционира. Денешните вести покажуваат дека планот за справување со инфлацијата функционира, јасно и едноставно“, рече министерот.
Тој посочи дека инфлацијата е сè уште превисока, што го прави уште поважно владата да се држи до својот план и да ја намали инфлацијата на половина за да го намали притисокот врз домаќинствата и бизнисите. „Тоа е единствениот пат до одржливо повисок раст“, рече Хант.
Според експертите на Канцеларијата за национална статистика, стапката на инфлација благо се намали во август, поттикната од падот на нестабилните трошоци за станови и авионски билети, како и цените на храната, кои пораснаа помалку од истиот период минатата година. Базичната инфлација забави повеќе од вкупната инфлација, благодарение на пониските цени на услугите.
