На Волстрит берзанските индекси пораснаа и минатата седмица, четврти пат со ред, достигнувајќи рекордни нивоа, додека на европските берзи цените на акциите благо се лизнаа од рекордното ниво.
На њујоршки Волстрит, индексот Dow Jones зајакна 1,2 отсто, на 40.003 поени, додека S&P 500 порасна за 1,5 отсто, на 5.303 поени, а индексот Nasdaq за 2,1 отсто, на 16.685 поени.
Индексите пораснаа четврта седмица со ред и достигнаа рекордни нивоа. Тоа најмногу се должи на надежите на инвеститорите дека инфлацијата во САД ќе ослабне во иднина, што би отворило простор за американската централна банка (Federal Reserve – Fed) да ги намали каматните стапки.
Минатата седмица, имено, беше објавено дека потрошувачките цени во април пораснале нешто помалку од очекуваното. Благодарение на тоа, заживеаја шпекулациите дека американската централна банка двапати ќе ги намали каматните стапки во втората половина од годината, во септември и декември, за по 0,25 процентни поени.
Но, инфлацијата сè уште е далеку над целното ниво на Fed од 2 отсто, а новите податоци, исто така, покажаа дека цените на производителите се зголемија повеќе од очекуваното во април. А тоа би можело да поттикне раст на потрошувачките цени во наредните месеци.
Дополнително, челниците на Fed повторуваат дека не се убедени оти инфлацијата е контролирана и дека не брзаат да ги намалат каматните стапки. Оттука, се поставува прашањето колку навистина се реални проценките на пазарот за намалувањето на каматните стапки. Дотолку повеќе што на почетокот на годината се шпекулираше дека Fed ќе ги намали каматните стапки најмалку пет пати оваа година, за вкупно 1,5 процентни поени.
„Се чини дека сите се фокусирани на тоа што Fed може да направи или не, имајќи предвид дека ја започнавме годината со очекувања дека каматните стапки ќе се намалат можеби дури шест пати, а сега тие очекувања паднаа на едно или две намалувања“, вели Силас Мајерс, управен директор во фондот „Mar Vista Investment Partners“.
А на европските берзи минатата недела се тргуваше претпазливо, па индексите се лизнаа од рекордните нивоа што ги достигнаа пред една седмица. Лондонски FTSE ослабе минатата седмица за 0,2 отсто, на 8.420 поени, додека франкфуртски DAX падна за 0,4 отсто, на 18.704 поени, а париски CAC за 0,6 отсто, на 8.167 поени.
