Акциите остро паднаа на Волстрит во вторникот, спуштајќи се на најниските нивоа за повеќе од три месеца, бидејќи инвеститорите стравуваат дека каматните стапки на американската централна банка ќе останат покачени подолго отколку што се надеваа.
Индексот Dow Jones се лизна за 1,14 отсто, на 33.618 поени, додека S&P 500 потона за 1,47 отсто, на 4.273 поени, а индексот Nasdaq 1,57 отсто, на 13.063 поени.
Во исто време, сите три индекса паднаа на најниско ниво во повеќе од три месеца. Во сите 11 најважни сектори на индексот S&P 500, цените на акциите вчера паднаа, а највисоко во технологијата, за 1,8 отсто.
И на повеќето европски берзи цените на акциите вчера паднаа. Сепак, лондонскиот FTSE индекс зајакна за 0,02 отсто, на 7.625 поени, но франкфуртски DAX се лизна за 0,97 отсто, на 15.255 поени, а париски CAC 0,70 отсто, на 7.074 поени.
Ова е резултат на проценката на шефот на американската централна банка Федералните резерви (Federal Reserve – Fed) дека каматните стапки би можеле дополнително да се зголемат до крајот на годината и дека тие би можеле да останат на покачени нивоа подолго од очекуваното.
И додека ова има негативно влијание врз берзата, приносите на американските државни обврзници достигнаа нови највисоки нивоа за 16 години, што ги прави обврзниците сè поатрактивна инвестиција.
„Пазарот продолжува да се прилагодува на повисоките каматни стапки. Бидејќи каматните стапки би можеле да останат покачени подолго од очекуваното, расте чувството дека пазарот е преценет, дека сегашните нивоа на цените не се одржливи… и тоа ги исплаши купувачите“, објаснува Бред Мекмилан, директор на „Commonwealth Financial Network“.
Инвеститорите беа загрижени и од предупредувањето на Moody’s дека затворањето на владините служби, иако привремено, ќе има лош ефект врз економијата и кредитниот рејтинг на САД. Имено, доколку Конгресот не обезбеди средства за фискалната година која започнува на 1-ви октомври, работата на владините служби би била стопирана, а стотици илјади вработени би биле привремено без работа и без плата.
Секоја година околу овој период од годината, републиканците и демократите преговараат за понатамошно финансирање за владините услуги, и тие обично постигнуваат договор во последен момент.
Инвеститорите, исто така, се претпазливи бидејќи оваа седмица треба да бидат објавени неколку важни извештаи, вклучително и инфлацијата, производството и бруто домашниот производ (БДП) во САД.
