На Волстрит во понеделникот индексот S&P 500 падна, исто како и Nasdaq индексот, бидејќи во пресрет на објавувањето на деловните резултати на „Nvidia“, акциите на технолошките гиганти се најдоа под притисок.
Индексот Dow Jones зајакна 0,16 отсто, на 41.240 поени, додека S&P 500 се лизна за 0,32 отсто, на 5.616 поени, а индексот Nasdaq 0,85 отсто, на 17.725 поени.
Во шест од 11-те најважни сектори на индексот S&P 500 вчера паднаа цените на акциите, а најмногу во технолошкиот сектор, во просек за 1,1 отсто.
Ова во голема мера се должи на падот на цената на акциите на „Nvidia“ за повеќе од 2 отсто пред кварталниот извештај за заработката на производителот на чипови во среда. Инвеститорите стравуваат дека резултатите на „Nvidia“ би можеле да бидат послаби од очекуваното. И се очекува многу бидејќи само силниот раст на добивката и приходите може да го оправда скокот на цената на акцијата од почетокот на оваа година за повеќе од 150 отсто.
„Nvidia може да разочара. Ова обично се случува кога повеќето инвеститори немаат поим дека вестите би можеле да бидат лоши“, вели Џејк Долерхид, директор во „Longbow Asset Management“.
Под притисок вчера беа и другите технолошки акции, бидејќи послабите резултати на Nvidia може да ја нарушат еуфоријата поврзана со развојот на вештачката интелигенција, што оваа година доведе до силен пораст на цените на акциите на компаниите како „Microsoft“, „Alphabet“ и „Mеta“.
Последните седмици, берзанскиот индекс силно порасна благодарение на очекувањата дека, поради ублажувањето на инфлацијата, американската централна банка ќе ги намали клучните каматни стапки во септември, првпат по неколкугодишното затегнување на монетарната политика. Се очекува Fed да ги намали каматните стапки за 0,25 процентни поени, а некои веруваат дека е можно поостро намалување за 0,50 процентни поени.
Внимателно вчера се тргуваше и на европските берзи. Франкфуртскиот DAX индексот ослабе за 0,09 отсто, на 18.617 поени, додека париски CAC зајакна за 0,18 отсто, на 7.590 поени. Во Британија немаше работа поради празниците.
