Помош од ЕУ вредна милијарда евра за да се запре протокот на мигранти објавија денеска во Либан претседателката на ЕК Урсула фон дер Лајен и кипарскиот претседател Никос Христодулидис, за време на нивната заедничка посета на оваа блискоисточна земја. Како што јави ДПА, повикувајќи се на информации од извори, кипарската влада неодамна го привлече вниманието на меѓународната заедница на неможноста да се ограничи зголемениот број сириски мигранти кои го напуштаат Либан и ја повика ЕУ да преземе мерки.
„Врските меѓу Либан и Европа се длабоки. Претседателот Христодулидис и јас сме тука да констатираме дека ЕУ цврсто го поддржува Либан и неговиот народ. И сакаме да ја зајакнеме нашата долгогодишна соработка“, напиша Фон дер Лејен на социјалната платформа Х.
Парите од Европската унија ќе бидат искористени за подобрување на здравството, образованието и социјалната заштита во Либан, изјавија претставници на ЕУ за ДПА. Дел од средствата ќе бидат наменети за националните безбедносни сили, како и за борба против шверцот, за економски и финансиски реформи, прецизира агенцијата.
