Љупчо Стојановски(57), дедото на малата Тамара Димовска од Велес, која почина во 2015 година чекајќи на операција на ‘рбетот во странство, е осуден на 7,5 години затвор за обид за убиство на поранешниот министер за здравство, Никола Тодоров, пресуди Кривичниот суд во Скопје.
Нападот се случи 1 јуни лани пред Министерствот за здравство каде Тодоров му ја предаде должноста на новиот министер, Арбен Таравари. Во тој момент Стојановски извади пиштол и испука, но обезбедувањето навремено го спречи, па куршумот не повредил никого.
Обвинителството побара продолжување на притворот до извршување на почетокот на казната со образложение дека постои опасност обвинетиот да го доврши делото и да им биде недостапен за органите на прогонот.
Одбраната најави жалба и побара поради здравствени проблеми на обвинетиот да му е укине притворот до извршување на казната.
Апелациониот суд пред две недели ја преиначи пресудата за Стојановски, кој беше осуден на условна казна затвор за поседување оружје по признанието вина. Обвинителството се жалеше, па дедото на Тамара со одлуката на второстепениот суд е осуден на ефективна казна затвор од 1 година.