Расте бројот на заболени од грип во Албанија во последните недели. Според извештаите од единиците за јавно здравје низ земјата, над 13 илјади се регистрирани само во последната седмица.
Она што е забележливо е дека најголем број од оние кои бараат лекарска помош се деца до 5-годишна возраст, што доведе и до преоптоварување на педијатриските амбуланти во последните денови од годината што штотуку ја оставивме зад нас. Иако инфекциите на горните дишни патишта се широко распространети низ целата земја, најголем број се во Ѓирокастро, Драч, Делвина и Валона, објавија албански медиуми.
Во моментов бројот на заболени од сезонски грип е значително поголем во споредба со пред една година, а според епидемиолозите во наредните недели се очекува зголемување бројот на заразени.
Тие советуваат дека вакцинацијата е најдобрата форма на заштита од тешки форми и смртни случаи.
Досега над 205 илјади албански граѓани, а најмногу повозрасни од 65 години, се вакцинирани против грип, која се добива бесплатно во здравствените домови низ земјата.
