Санкции за четири правни и две физички лица најави денеска Државниот инспекторат за животна средина во врска со отпадот кај селото Орман.
Директорот Сретен Стојковски на прес-конференција информираше дека ќе следи и соодветна постапка за санкционирање за неколкуте сторени законски повреди, односно за загрозување на животната средина и природа со отпад.
– Иако постои меѓусебен договор меѓу Рецикл Еко-старт и сопствениците на парцелите на локација на приватен имот во Орман, несоодветно е транспортиран и складиран отпад кој потекнува од правниот субјект Рецикл Еко-старт, на локација која не е наменета за складирање на ваков отпад, односно нема добиено дозвола од МЖСПП што е казниво по закон, појасни Стојковски.
Изминатиот месец инспектор од Општина Ѓорче Петров утврди дека на приватен плац во селото Орман биле најдени 600-тони опасен отпад од акумулатори за кој граѓаните велат дека таму стои веќе шест месеци.
Стојковски информираше и за наодите од други инспекциски надзори помеѓу кои и вонредниот инспекциски надзор во ДИС ЕНЕРГИА ДОО СКОПЈЕ и ДПТТР ЕУРОПРОГРЕС ДООЕЛ.
