Претставата „Папагалот Историко“, во режија на еден од бардовите на македонскиот театар Љубиша Георгиевски, а во драматизација на Сашо Насев, која требаше да се одигра вчера, во петокот со почеток во 20 часот, без образложение беше повлечена од репертоарот на Драмски театар, објави ја Facebook еден од актерите во претставата, Владо Јовановски.
Експресно беше ажуриран и сајтот на Драмски татар, а директорот Сашо Тасевски, кој е познат како политички силно ангажиран на социјалните мрежи и е поставен од новата власт на СДСМ, остана без коментар.
„Реков, повелете дојдете, додека не е тргната, како никогаш да не била, како никогаш да не постоела.. И глеј чудо, сабајле ме известија дека нема да се игра утре… Откако дојде животот и слободата во Македонија, не мора да си видовит, за да ги гледаш однапред работите.. Не дека сум изненаден, ова го кажувам, чисто за да се забележи…Поздрав и секое добро! И утре има ден!“, објави Јовановски.
Драмите на Сашо Насев, повеќе од 25 години се играат на сцената на Драмски театар, а во времето на актерот Сашо Тасевски негова драма првпат е симната од репертоарот на овој театар.
Претставата „Папагалот Историкот“ го означи почетокот на театарската сезона во Драмски театар. Премиерно беше изведена на 23-ти септември. Тоа е филозофски трактат со моќни карактери во него и еден вид историски пресек на епохата на југословенскиот социјалистички поредок сосе слободата што дојде потоа. Во претставата „Папагалот Историко“ играат актерите Владо Јовановски, Благица Димитровска, Калина Наумовска, Дамјан Цветановски, Ѓорги Тодоровски и студентите Томислав Давидовски, Исмет Шабановиќ и Кристијан Танчевски.
„’Папагалот Историко‘ е жесток, отворен, политички ангажиран и емотивен театар, преполн со иронии и идеи за тоа како било, како е и како подобро може да стане. Во театарот, се разбира. Затоа што никој од нас, ама баш никој од екипата, со сите зад неа од инспициентот до последниот сценски мајстор, никој од нас немаше поинаква желба од онаа што пред многу стотици и илјади години ни ја кажа Аристотел – освен фабула и карактери, трагедијата мора да има мисла!“, вели авторот Насев за претставата.
